Նախընտրական քարոզարշավի ժամանակ Նիկոլ Փաշինյանի հետ վիճաբանության մեջ մտած անհետ կորած Հրանտ Պապիկյանի քույրը՝ մանկաբարձ-գինեկոլոգ Արփինե Սողոյանը դեռ նոր աշխատանք չի գտել։ Նրա դուստրը՝ փաստաբան Տաթեւիկ Սողոյանը, մեզ հետ զրույցում հայտնեց, որ մայրը դեռ շարունակում է աշխատել «Քանաքեռ-Զեյթուն» առողջության կենտրոնում, որպես կանանց կոնսուլտացիայի բաժնի վարիչ։

«Այդ ծանուցումը, որը ստացել է հաստիքի կրճատման մասին, դրանով սահմանվել էր, որ մինչև սեպտեմբերի 13-ը շարունակելու է աշխատել, պայմանագիրը լուծարվելու է սեպտեմբերի 14-ից։ Բայց, բացի պոլիկլինիկայից, նա աշխատում է նաև ստացիոնար հիվանդանոցում, ծնունդներ է ընդունում, վիրահատություններ է անում։ Դեռևս քննարկումների մեջ է, երբ սեպտեմբերի 14-ից լուծարված կլինի պոլիկլինիկայի պայմանագիրը, քննարկվում է, թե պոլիկլինիկական կոնսուլտացիաներ ուրիշ որտեղ անի, դեռ դրան փոխարինող աշխատանք չի գտել»,- ասաց նա։

Հիշեցնենք, որ Սողոյանը Փաշինյանին մեղադրել էր հայրենիքը գողանալու մեջ։ Իսկ վերջինս շատ կոշտ էր արձագանքել։ «Եթե դուք Ռոբն եք, ձեզ կզացնելու եմ։ Էդ Ղարաբաղի ակցենտով դիմակավորվածներ կան, որ վիդեոներ են տարածում։ Դուք եք փախած լակոտները, հանեք ձեր դիմակները, այ ստահակներ, այ փախածներ, այ մեր երեխեքին հակառակորդի առաջ մենակ թողածներ։ Ռոբի լակոտներ, Սերժի լակոտներ, Գագոյի լակոտներ…»,- ասել էր Փաշինյանը։