Հարձակվել են Մոսկվայի վրա և ոչ միայն․ ինչ է կատարվում
Fri, 28 Aug 2026 11:00:58 +0400
Ուկրաինայի զինված ուժերի անօդաչու թռչող սարքերը հարձակվել են Մոսկվայի, Ռուսաստանի մարզերի և բռնակցված Ղրիմի վրա: Բռնակցված Սևաստոպոլի իշխանությունները պնդում են, որ անօդաչու սարքերից մեկը հարվածել է հինգհարկանի բնակելի շենքի մուտքին՝ հրդեհելով մեկ բնակարան: Երկու մարդ վիրավորվել է։
Բացի այդ, բռնակցված Սևաստոպոլի նահանգապետ Միխայիլ Ռազվոժաևի խոսքով, ԱԹՍ-ները հարվածել են «հին պահեստային բաքերին (ցիստեռններին)»: Այնտեղ հրդեհ է բռնկվել, որը մարվել է հյուրանոցի աշխատակիցների կողմից, գրել է Ռազվոժաևը՝ հավելելով, որ զոհեր չկան։
Մոսկվայի քաղաքապետ Սերգեյ Սոբյանինը հայտնել է, որ Ռուսաստանի մայրաքաղաքին մոտենալիս խոցվել են երկու անօդաչու սարքեր։
Յարոսլավլի մարզի նահանգապետ Միխայիլ Եվրաևը սոցիալական ցանցերում հայտարարել է, որ Յարոսլավլից դեպի Մոսկվա ելքը փակվել է «անվտանգության նկատառումներից ելնելով»:
Ուկրաինական Exilenova+ և Supernova+ մոնիթորինգային ալիքները հայտնել են Յարոսլավլի մարզում գտնվող «Սլավնեֆտ-Յանոս» նավթավերամշակման գործարանի վրա հարձակման և հրդեհի մասին: Մոնիթորինգային ալիքները հայտնել են, որ անօդաչու թռչող սարքի բեկորները ընկել են Մոսկվայի մարզի Պավլովսկի Պոսադ քաղաքում գտնվող «Մագնիտ» սուպերմարկետի վրա: Այլ մանրամասներ չեն տրամադրվել:
Telegram ալիքները նաև հայտնել են, որ Ռուսաստանի Սարատովի մարզը գիշերը հարձակման է ենթարկվել: Ենթադրվում է, որ հարձակման թիրախը կարող էր լինել «Էնգելս-2» ավիաբազան:
«Ռոսավիացիա»-ն հայտնել է, որ անօդաչու թռչող սարքի մասին տագնապ է հայտարարվել Յարոսլավլի, Տուլայի, Պենզայի և Սամարայի մարզերում: Սահմանափակումներ են մտցվել Կրասնոդարի, Սոչիի, Պենզայի, Սարատովի, Սամարայի, Ուլյանովսկի, Սարանսկի, Կալուգայի, Տամբովի, Յարոսլավլի, Կիրովի և Իվանովոյի օդանավակայաններում: