«Ռոբոտների մանկապարտեզ» է բացվել
Fri, 04 Sep 2026 21:00:40 +0400
Չինաստանում բացվել է աշխարհում առաջին «ռոբոտների մանկապարտեզը»։ Մանկապարտեզում կիրականացվի ռոբոտների այլընտրանքային եղանակներով ուսուցում։ Այս մասին հայտնում է Global Times պարբերականը։ Մանկապարտեզը հիմնադրել է Tashan Technology ընկերությունը։ Գիտնականները ռոբոտների ուսուցման այս էքսպերիմենտալ կենտրոնում ցանկանում են հասնել նրան, որ ռոբոտները սովորեն սեփական սխալների եւ փորձառության հիման վրա եւ ոչ թե անմիջականորեն մարդու կողմից վարժեցվեն։ Մանկապարտեզում ուսուցումը ենթադրում է, որ շահագործման հանձնվելուց արդեն անմիջապես հետո ռոբոտը կարող է սկսել իր ադապտացիոն ուսուցման շրջանը՝ իր վրա փորձարկելով նաեւ այնպիսի իրավիճակներ, որոնց համար ստեղծված չի եղել։
Օրինակ, եթե շարժվելիս ռոբոտը բախվի պատի կամ արգելապատնեշի, ապա պետք է, ըստ իր մեջ եղած ծրագրային ապահովման, փոխի շարժման ուղղությունը, որպեսզի նույն սխալն այլեւս չկրկնի։ Այս կերպ ձախողումը դառնում է դաս քաղելու եւ սխալն ուղղելու մեխանիզմ։
Գիտնականները նաեւ ցանկանում են, որ ռոբոտները կարողանան ինքնուրույն ուսումնասիրել իրենց շրջապատող աշխարհը եւ դրանով ընդլայնել իրենց ֆունկցիոնալությունը՝ կատարելագործվելով ու փորձառություն ձեռք բերելով ինքնավար կերպով։ Դա, իհարկե, ժամանակատար է, ինչպես մարդու, երեխայի պարագայում է։ Սակայն գիտնականները վճռական են տրամադրված այն բանում, որ պետք է հասնեն նրան, որ ռոբոտը կարողանա սովորել ուղղել սխալները։ Ավելի մեծ ժամանակային հեռանկարում նախատեսվում է հասնել նրան, որ ռոբոտներն իրենց «փորձառությամբ», «գիտելիքներով» ու «հմտություններով» կարողանան կիսվել մեկմեկու հետ։