Արցախցիներին քաշքշուկների մեջ են գցում
Fri, 04 Sep 2026 21:15:54 +0400
Ստեփանակերտում ապրած, Արցախից բռնագաղթած 70-ամյա Գրիշա Յարամիշյանը մեզ պատմեց իր պատմույթունը: Նրա կինն Արցախում ավտովթարից մահացել է, ինքը տեղափոխվել է Հայաստան եւ Բերդ համայնքի Չինչին գյուղում ապրում է ծեր մոր հետ։
Նրա խոսքերով՝ Չինչինում բռնագաղթած 4 արցախցի է ապրում։ Նա Չինչինում սեփական տուն չունի։ Այն հարցին, թե ինչու չի օգտվում արցախցիներին տրվող բնակարանային ապահովման սերտիֆիկատի գումարներից, դրանցով գյուղում տուն չի գնում, պատասխանեց՝ արցախցիներին ՀՀ քաղաքացիություն տալու գործում արհեստական դժվարություններ են ստեղծում, պահանջում են տարատեսակ փաստաթղթեր, անհարկի ձգձգում են գործընթացը։ Նա զայրացած ասաց․ «Մոսկվայում թափառական շներին փողոցից վերցնում, խնամում, ապաստան են հատկացնում, իսկ՝ մեզ․․․»։