Խոշոր ավիաընկերությունները չեղարկում են չվերթները դեպի ՌԴ․ ինչ է կատարվում
Sun, 06 Sep 2026 14:45:03 +0400
Անվտանգային ռիսկերի մեծացման ֆոնին միջազգային ավիափոխադրողները սկսել են կրճատել կամ չեղարկել դեպի Ռուսաստանի Դաշնություն իրականացվող ուղևորափոխադրումները։ Այս գործընթացին սկիզբ է դրել թուրքական Pegasus Airlines ընկերությունը, որից հետո նմանօրինակ որոշումներ են կայացրել նաև Turkish Airlines-ը և եգիպտական Nesma Airlines-ը։ Թռիչքների կրճատումը պայմանավորված է օդային տարածքում ռազմական ակտիվության և անօդաչու թռչող սարքերի կիրառման աճով։
Իրադարձությունների զարգացմանը նախորդել էր Ուկրաինայի նախագահ Վլադիմիր Զելենսկու հայտարարությունն այն մասին, որ Ռուսաստանի երկինքը քաղաքացիական ավիացիայի համար դառնում է խիստ վտանգավոր։ Կիևը պաշտոնական նամակով դիմել էր Քաղաքացիական ավիացիայի միջազգային կազմակերպությանը (ICAO)՝ ահազանգելով հարևան երկրի օդային տարածքում ուղևորատար ինքնաթիռների շահագործման հետ կապված սպառնալիքների մասին։
Ի պատասխան ուկրաինական կողմի քայլերի՝ Ռուսաստանի օդային տրանսպորտի դաշնային գործակալությունը («Ռոսավիացիա») հանդես է եկել NOTAM ծանուցմամբ։ Գերատեսչությունը շեշտել է, որ Ուկրաինայի տարածած որևէ փաստաթուղթ ՌԴ օդային տարածքի վերաբերյալ չունի իրավական ուժ։ Չնայած այս հայտարարությանը՝ մի շարք միջազգային գործընկերներ նախընտրում են վերանայել իրենց չվացուցակները՝ խուսափելով հնարավոր վտանգներից։
Հիշեցնենք, որ 2022 թվականի փետրվարի 24-ից ամբողջությամբ փակ է Ուկրաինայի օդային տարածքը, իսկ քաղաքացիական ինքնաթիռները շրջանցում են այն։ Այժմ նմանատիպ մտահոգություններ են ձևավորվում նաև ռուսական երկնքում միջազգային կանոնավոր չվերթերի պահպանման շուրջ։