Վարչապետ Նիկոլ Փաշինյանը Փարիզում մասնակցել է Միջազգային տիեզերական գագաթնաժողովին: Այս մասին հաղորդում են Կառավարության լրատվական ծառայությունից։ «Բարձրաստիճան հյուրերի դիմավորման արարողությունից հետո տեղի է ունեցել գագաթնաժողովի բացման արարողությունը, որի ընթացքում ողջույնի խոսքով հանդես է եկել Ֆրանսիայի նախագահ Էմանուել Մակրոնը։ Միջոցառմանը մասնակցել են նաև Եվրոպական հանձնաժողովի նախագահ Ուրսուլա ֆոն դեր Լայենը, Հունաստանի վարչապետ Կիրիկոս Միցոտակիսը, Ֆինլանդիայի նախագահ Ալեքսանդր Ստուբը, Վրաստանի վարչապետ Իրակլի Կոբախիձեն և այլ բարձրաստիճան պաշտոնյաներ։ Հաջորդիվ` վարչապետ Փաշինյանը մասնակցել է «Տիեզերական ենթակառուցվածքների ապագայի տեսլականները» խորագրով պանելային քննարկմանը, որի ընթացքում հանդես է եկել ելույթով։ Նա մասնավորապես, նշել է․

«…Հայաստանը թևակոխել է իր ազգային տիեզերական կարողությունների զարգացման նոր փուլ։ 2022 թվականին Հայաստանն արձակեց իր առաջին արբանյակը՝ ARMSAT-1-ը, որը մշակվել էր եվրոպական տեխնոլոգիաներով և ուղեծիր էր դուրս բերվել SpaceX-ի կողմից։ Ընդամենը մեկ տարի անց մենք հասանք ևս մեկ հանգրվանի՝ HAYASAT-1-ին, որը հայ մասնագետների կողմից ամբողջությամբ հավաքված և փորձարկված առաջին հայկական արբանյակն է։
2026-2031 թվականների Հայաստանի Կառավարության ծրագիրն ազգային տիեզերական կարողությունների զարգացումը սահմանում է որպես առանձին ռազմավարական նպատակ։ Հայաստանը մտադիր է գործարկել առնվազն երեք արբանյակ՝ երկուսը Երկրի դիտարկման և մեկը՝ հեռահաղորդակցության համար, միաժամանակ զարգացնելով սեփական գետնային ենթակառուցվածքներ և ներքին կարողություններ արբանյակային կառավարման, տվյալների ընդունման, մշակման և վերլուծության համար։ Մենք նաև նախատեսում ենք ստեղծել գետնային կայանների բաշխված ցանց, որը կարող է սպասարկել ոչ միայն Հայաստանի ազգային կարիքները, այլև աջակցել միջազգային տիեզերական առաքելություններին և արբանյակային տվյալների ու ծառայությունների աճող պահանջարկին։ Առաջ նայելով՝ Հայաստանը նպատակ ունի ավելի ակտիվորեն մասնակցել միջազգային տիեզերական ծրագրերին՝ հնարավորություն տալով հայ ինժեներներին և ընկերություններին ներդրում ունենալ տիեզերական հետազոտությունների համար նախատեսված բարդ համակարգերի և սարքավորումների նախագծման, ճարտարագիտության և արտադրության մեջ»։

Քաղաքագետ Ստեփան Դանիելյանը, «Հրապարակի» հետ զրույցում, խոսելով Փաշինյանի Փարիզ կատարած այցի մասին, նկատում է. «Առաջին հերթին Փաշինյանն այս այցով ուզում է Ռուսաստանին ինչ-որ բան ցույց տալ: Նա գիտի, որ Մոսկվան տնտեսական սանկցիաներ է Հայաստանի դեմ կիրառում, իսկ առաջիկայում կարող է թանկանալ նաև գազի սակագինը, և Փաշինյանն ուզում է այսօր ցույց տալ, որ ինքը ունի այլընտրանք, իսկ եվրոպական երկրները գրկաբաց իրեն են սպասում, կոպիտ ասած` ուզում է ցույց տալ, որ եվրոպական երկրներն իրեն մարդատեղ են դնում, և նույնիսկ տիեզերական գագաթնաժողովների են հրավիրում: Մոսկվա գնալուց առաջ, Ռուսաստանի նախագահին ուզում է ցույց տալ, որ ունի այլընտրանք: Նա առանձնապես հայ ժողովրդին այս քայլով ցույց տալու բան չունի, այս պահին միայն մեկ բանից է վախենում, որ կարող է տնտեսական բունտ լինել, սակայն դա այս պահին չի սպասվում` հունվարից հետո կարող է լինել, հատկապես` փետրվար-մարտ ամիսներին: Նա կարող է տիեզերաժողովների գնալ, կարող է ատաղձագործության մասին համաժողովների գնալ, թեման նրա համար կարևոր չէ: Փաշինյանին ժամանակ է տրվել, մինչև դեկտեմբեր կողմնորոշվել, և հանրաքվե անցկացնել, սակայն նա չի անցկացնելու հանրաքվե»: