«Հրապարակ»․ Ինչպե՞ս է գյուղի խմելու ջրում սնդիկ հայտնվել
Fri, 18 Sep 2026 10:25:49 +0400
Օրերս առողջապահության նախարարությունը հայտնեց, որ Սյունիքի մարզի սահմանամերձ Ծավ բնակավայրի բնակիչներից մեկը դիմել է «Հիվանդությունների վերահսկման եւ կանխարգելման ազգային կենտրոն» ՊՈԱԿ-ի Սյունիքի մասնաճյուղ՝ հայտնելով, որ իր բնակարանի ծորակից հոսող ջրում նկատել է մետաղական զանգված, ինչից հետո նրա տնից կատարել են ջրի նմուշառում։ Ստացված լաբորատոր հետազոտության արդյունքում նմուշում սնդիկի պարունակությունը սահմանային թույլատրելի շեմը գերազանցել է: Ապա կրկնակի նմուշառումներ են կատարվել չորս կետից, այդ թվում՝ ջրաղբյուրից եւ բնակիչների ծորակներից։ Ստացված արդյունքներով կրկին արձանագրվել են նույն ցուցանիշները։
Ծավ համայնքի վարչական ղեկավար Արմեն Ալեքսանյանը մեզ հետ զրույցում նշեց, որ դեռեւս հայտնի չէ, թե ինչպես է սնդիկը հայտնվել խմելու ջրում․ «Համապատասխան մարմինները զբաղվում են այդ հարցով։ Համայնքապետարանի ուժերով բնակիչներին առայժմ տրամադրում ենք խմելու ջուր, մինչեւ պաշտոնական տվյալներ ստանանք»։ Հարցին՝ նախկինում նման դեպքեր եղե՞լ են,՝ Ալեքսանյանը բացասական պատասխան տվեց․ «Պատմության մեջ սա առաջին դեպքն է, որ նման բան է տեղի ունեցել»։ Նա չցանկացավ պատասխանել հարցին, թե ջրի մեջ սնդիկի հայտնվելը կարո՞ղ է միտումնավոր է արվել՝ հաշվի առնելով նաեւ այն հանգամանքը, որ Ծավ բնակավայրը սահմանամերձ է Ադրբեջանի հետ։ «Հրապարակման ենթակա որեւէ տեսակետ չունեմ»։
Առողջապահության նախարարությունը հորդորում է բնակիչներին` մինչեւ ջրի որակի վերականգնումը, զերծ մնալ ջրի օգտագործումից` խմելու եւ կենցաղային նպատակներով: «Վեոլիա ջուրն» էլ հայտարարել է, որ Ծավում իրենք չեն իրականացնում ջրամատակարարումը: