Թուրք ընդդիմադիր գործիչը կոչ է արել բացել Հայաստանի հետ սահմանը
Fri, 18 Sep 2026 10:30:05 +0400
Թուրքիայի ընդդիմադիր «Ժողովրդահանրապետական» կուսակցության (ԺՀԿ֊CHP) Կարսի պատգամավոր Ինան Աքգյուն Ալփն այցելել է հայ-թուրքական սահմանին գտնվող Աքյաքա շրջան։ Նա կոչ է արել բացել Հայաստանի հետ սահմանը և վերսկսել տարածաշրջանային առևտուրը։
Ըստ ընդդիմադիր գործչի՝ անցյալի հակամարտություններից հետո առաջնահերթություն պետք է տրվի տարածաշրջանի խաղաղությանը և բարօրությանը։
Նրա խոսքով՝ վերջին տարիներին Թուրքիայի և Հայաստանի միջև ուղիղ շփումների միջոցով կարգավորման գործընթաց է իրականացվում և բանակցությունների ընթացքում քննարկվում են նաև սահմանային անցակետերի օգտագործման և տրանսպորտային կապերի վերաբերյալ հարցերը։ Այս մասին հայտնում է Ermenihaber-ը՝ հղում անելով Anka-ին։
Ալփը, խոսելով Ադրբեջան-Հայաստան խաղաղության գործընթացի մասին, նշել է, որ ցանկանում է, որ Ադրբեջանի և Հայաստանի միջև ընթացող գործընթացը վերածվի կայուն խաղաղության։
«Մենք ցանկանում ենք, որ Ադրբեջանի հետ խնդիրները վերածվեն երկարատև խաղաղության, վերաբացվի Հայաստանի հետ սահմանը և առևտուրը սկսվի այս երթուղով»,- նշել է նա։