ՔՊ-ական պատգամավոր, 1990 թ. ծնված Արաքսյա Վարդանյանի առաջին ելույթն ԱԺ-ում հանրությունը երկար կհիշի: Փարաքար համայնքի ավագանու նախկին անդամն ԱԺ-ում պատմեց, թե ինչպես էր ձեռքերը վառարանի վրա տաքացնում եւ «մացեմածիկայի ժամին գրատախտակին գնում»: Անգամ Ռուբեն Ռուբինյանը ստիպված եղավ դադարեցնել ելույթը եւ հորդորեց խոսել օրակարգային հարցերից: Պարզվեց՝ դա Արաքսյա Վարդանյանի սիրած թեման է, նա նմանատիպ մի ելույթ էլ ունեցել էր սեպտեմբերի 1-ին` Թաիրովի վերանորոգված դպրոցում, որին մասնակցել է նաեւ մարզպետ Վահրամ Խաչատրյանը. «Երբ որ ես էի աշակերտ, ես սովորում եւ օլիմպիադայի էի գնում դպրոցներում, որտեղ դասի ընթացքում նույնիսկ առնետներ կային: Երբ որ ես էի սովորում եւ գրատախտակին էի գրում, կավիճը բռնելուց առաջ մոտ 10 րոպե պետք է վառարանի մոտ, ոչ թե պետք է տաքացնեի ձեռքերս, այլ՝ բառից բուն իմաստով, ձեռքերս կպցնեի վառարանին, որպեսզի կարողանայի բռնել կավիճը, հետեւաբար, սիրելի աշակերտներ, դուք շատ լավ դպրոցում եք սովորում»:

Պատգամավոր Արաքսյա Վարդանյանը 2010 թվին ավարտել է գյուղատնտեսական քոլեջի տնտեսագիտության ֆակուլտետը՝ «ֆինանսներ եւ վարկ» մասնագիտությամբ, 2013 թ․՝ Հայաստանի ազգային ագրարային համալսարանի տնտեսագիտության ֆակուլտետը՝ «ագրոպարենային համակարգի ֆինանսներ եւ վարկ» մասնագիտությամբ։ 2016 թ. ուսանել է ՀՀ պետական կառավարման ակադեմիայում, իսկ 2022-ից Մանկավարժական համալսարանի հոգեբանության ամբիոնի հայցորդ է։ Նա 2021-2025 թթ. Փարաքարի ավագանու ՔՊ խմբակցության ղեկավարն է եղել, «Ձորակ» հոգեկան առողջության խնդիրներ ունեցող անձանց խնամքի կենտրոնի տնօրենի տեղակալ եւ տնօրենի ԺՊ: Մինչեւ պատգամավոր դառնալը Արաքսյա Վարդանյանը նաեւ մասնակցել է Աննա Հակոբյանի «Կրթվելը նորաձեւ է» դասընթացներին։ Նա իր էջում գրել է. «Կրթվենք, ապա նոր կրթենք։ Ահա սա է մեր կարգախոսը»։
Ի դեպ, նա այս տարիների ընթացքում բավականին ունեցվածքի տեր է դարձել: 2026-ին հայտարարագրել է հողամաս, անհատական բնակելի տուն, ավտոտնակ, այլ անշարժ գույք: 4 անշարժ գույք ձեռք է բերել 2025 թվականին` Բաղրամյան գյուղում, տրանսպորտային միջոց HONDA` 2018 թ.: 2024 թվականին հայտարարագրել էր անշարժ գույք՝ բնակելի տուն Փարաքարում (համատեղ սեփականություն, 2013թ.), հողամաս Փարաքարում (2019թ.), թանկարժեք զարդ՝ 20 մլն դրամ արժեքով, որը գնել է 2013-ին, եւ այլն: