Ռազմական կործանիչ ինքնաթիռների գործարքը հաստատվել է
Fri, 18 Sep 2026 22:00:01 +0400
ԱՄՆ Պետքարտուղարությունը հաստատել է Սաուդյան Արաբիային Lockheed Martin ընկերության արտադրած F-35 Lightning II Joint Strike Fighter գերժամանակակից ռազմական կործանիչ ինքնաթիռի վաճառքի գործարքը։ Գործարքի ընդհանուր արժեքը կազմում է 24,3 միլիարդ դոլար։ Այս մասին հայտնում է Reuters լրատվական գործակալությունը։ Գործարքի շրջանակում Սաուդյան Արաբիան կստանա 48 միավոր նշված ռազմական կործանիչ ինքնաթիռներից եւ 49 միավոր Pratt & Whitney շարժիչներից։ Գործարքի մաս են կազմում նաեւ կապի միջոցները, պահեստամասերը եւ այլ սարքավորումներ եւ ծառայություններ, որոնք անհրաժեշտ են ձեռք բերված սպառազինությունների եւ սարքավորումների սպասարկման եւ օգտագործման համար։ Նշված գործարքը, ըստ Պետքարտուղարության հայտարարության, չի փոխի ուժերի հարաբերակցությունը Մերձավոր Արեւելքում։