Հայկազովի պայթյունի զոհերի ընտանիքները պետք է ունենան հստակ կարգավիճակ
Fri, 25 Sep 2026 12:17:10 +0400
«Ապրելու երկիր» կուսակցության համահիմնադիր Մանե Թանդիլյանն անդրադարձել է Արցախից բռնի տեղահանման օրերին Հայկազովի բենզինի պահեստում տեղի ունեցած պայթյունի հետևանքներին։
Նա նշել է, որ պայթյունը Արցախի ժողովրդի բռնագաղթի և էթնիկ զտման ընթացքում տեղի ունեցած ամենածանր ողբերգություններից մեկն էր։ Նրա խոսքով՝ միջադեպի հետևանքով ավելի քան 200 մարդ զոհվեց, իսկ հարյուրավոր մարդիկ տարբեր աստիճանի ծանր այրվածքներով և վնասվածքներով երկար ժամանակ պայքարեցին կյանքի համար։
Թանդիլյանի փոխանցմամբ՝ բազմաթիվ տուժածներ մինչ օրս շարունակում են ապրել ողբերգության ֆիզիկական և հոգեբանական հետևանքներով։ Միաժամանակ, ավելի քան երկու տասնյակ անձանց ճակատագրի վերաբերյալ մինչ օրս հստակ տեղեկություն չկա։ Նա ընդգծել է, որ անհետ կորածների ընտանիքները նույնիսկ հնարավորություն չեն ունեցել գտնելու իրենց հարազատների մասունքները և պատշաճ հուղարկավորություն կազմակերպելու։
Կուսակցության համահիմնադիրը կարևորել է նաև պայթյունի հանգամանքների ուսումնասիրությունը՝ հարց բարձրացնելով վառելիքի բաշխման կազմակերպման, տեղի ունեցածի պատճառների և պատասխանատուների վերաբերյալ։
Միաժամանակ, ըստ նրա, առանձին ուշադրության է արժանի զոհերի, վիրավորների և անհետ կորածների ընտանիքների սոցիալական վիճակը։ Թանդիլյանը կարծում է, որ այս խմբերը պետք է ունենան հստակ իրավական կարգավիճակ և պետական աջակցության համապատասխան մեխանիզմներ։
Նրա խոսքով՝ հարազատի կորուստը, անհետ կորածի ճակատագրի անորոշությունը, ծանր վնասվածքներն ու երկարատև բուժման անհրաժեշտությունը ընտանիքների համար ստեղծում են ոչ միայն ֆիզիկական և հոգեբանական, այլև սոցիալական ու ֆինանսական ծանր խնդիրներ։
Թանդիլյանն առաջարկում է գնահատել այդ ընտանիքների կարիքները, սահմանել նրանց կարգավիճակը և ապահովել անհրաժեշտ աջակցություն՝ բժշկական օգնությունից ու վերականգնողական բուժումից մինչև սոցիալական և նյութական օժանդակություն։
Նա նաև հատուկ երախտագիտություն է հայտնել փրկարարներին և բուժաշխատողներին, որոնք պայթյունից հետո, սեփական կյանքը վտանգելով, իրականացրել են իրենց մասնագիտական պարտականությունները։