F-35 Lightning II գերժամանակակից ամերիկյան ռազմական կործանիչ ինքնաթիռի որոշ բաղադրիչներ, որոնց մասին տվյալները գաղտնի են, հայտնվել են Չինաստանում, որտեղ կարող են հետազոտվել։ Դա նշանակում է, որ չինական կողմին հասանելի են դարձել ամերիկյան այդ կործանիչ ինքնաթիռի հնարավորությունները, եւ նա հարկ եղած դեպքում կարող է այն օգտագործել ընդդեմ Միացյալ Նահանգների՝ հայտնում է Bloomberg պարբերականը։ Նախնական վարկածի համաձայն, այդ դետալները Չինաստան են ուղարկվել սխալմամբ։ Սակայն հնարավոր է, որ իրականում գործ ունենանք «լրտեսության» հետ։ Դետալներն արտադրվել են Lockheed Martin ընկերության կողմից։ Դրանք այնպիսի բաղադրամասեր են, որոնք ապահովում են ինքնաթիռի գրեթե անտեսանելիությունը եւ ռադիոլոկացիան։ Առայժմ հայտնի է միայն այն, որ Չինաստանի իշխանություններն արդեն գիտեն, որ այդ դետալները Չինաստանում են, սակայն դեռ հետ չեն վերադարձրել։

Պենտագոնը հայտարարել է, որ աշխատում է, որպեսզի այդ պահեստամասերը վերադարձվեն Միացյալ Նահանգներ։ Եվ ահա, պարզվել է, որ United Parcel Service (UPS) ընկերության աշխատակիցը, որը զբաղվում է արագ առաքումներով, բավարար թերացել է իր աշխատանքում եւ թերեւս սխալմամբ՝ այդ գաղտնի տեխնոլոգիաներով արտադրված պահեստամասերն ուղարկել է Հոնկոնգ՝ նշանակված վայրը ուղարկելու փոխարեն։ Աշխատակիցը պարզապես չի կարդացել առաքված պահեստամասերին կցված նամակը, որում ասված է եղել, որ որեւէ դեպքում չի կարելի դրանք ուղարկել Հոնկոնգով։ Նաեւ պարզվել է, որ առաքումը որոշակիորեն ձգձգվել է, եւ որպեսզի արագացվի, աշխատակիցը, վերոնշյալ նամակին ուշադրություն չդարձնելով, ընտրել է առաքման այն ճանապարհը, որն անցնում է Հոնկոնգով։ ԱՄՆ Կոնգրեսն արդեն պահանջել է ստուգել այն ուղիները, որոնցով ուղարկվում են ամերիկյան սպառազինությունների պահեստամասերը։ Թե որքանով է կատարվածը պարզապես աշխատանքային թերացման հետեւանք, դժվար է ասել, սակայն Պենտագոնը կատարվածի հետ կապված անցկացնում է հետաքննություն եւ փորձում է անել հնարավորը՝ Չինաստանից այդ պահեստամասերը հետ ստանալու համար։