Գրել էինք, որ արդեն մի քանի ամիս Նոր Նորք վարչական շրջանի Գալշոյան փողոցի 12 եւ 18 շենքերի միջեւ գտնվող այգում է գիշերում 59-ամյա Վահանը, որն անգամ իր անունը դժվարությամբ է հիշում։ Շների հետ երեկոյան զբոսանքի դուրս եկած Ժոզեֆինան տղամարդուն նկատել, մոտեցել, հարցուփորձ էր արել, եւ տղամարդն իր մասին կցկտուր տեղեկություններ էր հայտնել։

Մեզ հետ զրույցում աղջիկը պատմել էր, որ փողոցում հայտնված մարդն ադեկվատ է, բարեհամբույր, բայց հիշողության հետ կապված խնդիր ունի․ «Շատ դժվարությամբ անունը հիշեց, բայց չկարողացավ ազգանունը հիշել, չի հիշում նաեւ, թե որտեղ է եղել իր տունը, ինչպես է դրսում հայտնվել, միայն մատով ցույց է տալիս դիմացի շենքը, փորձում է ինչ-որ բաներ հասկացնել, բայց հստակ ոչինչ չի ասում։ Երեկոյան շատ ուշ ժամի է գալիս այդ այգի՝ երեւի գիշերելու համար, դրա համար բնակիչներից շատերը երեւի չեն էլ նկատել նրան։ Մի քանի անգամ հարցրել եմ, ասում է, որ որեւէ խնամքի կենտրոնում չի եղել, բայց չեմ կարող վստահ պնդել։ Իր մոտ բժշկական փաստաթղթեր կային, որից էլ տարիքն ու անուն-ազգանունը իմացա։ Ես մասնագիտությամբ բժիշկ չեմ ու չեմ կարող հստակ ասել, թե ինչ խնդիրներ ունի, բայց ակնհայտ է, որ խոսքը ծանր դեպքի մասին է։ Ես ամեն օր իրեն սնունդ եմ տանում, բայց դա հարցի լուծում չէ, օրերը ցրտում են, նրան կացարան է պետք»։

Մենք դիմել էինք նաեւ աշխատանքի եւ բարեկեցության նախարարություն, ահազանգը փոխանցել։ Երեկ տեղեկացանք, որ անտուն տղամարդուն տեղափոխել են կացարան։ Նախարարությունից մեզ հայտնեցին, որ այժմ նրա կարիքներն են գնահատվում, արդյունքները կհասցեագրվեն համապատասխան մարմիններին։