Պորտուգալիայում զանգվածային բողոքի ցույցեր են՝ բնակարանային ճգնաժամի և գների աճի պատճառով
Sun, 18 Oct 2026 18:15:29 +0400
Հազարավոր մարդիկ շաբաթ օրը՝ հոկտեմբերի 17-ին, դուրս են եկել Լիսաբոնի, Պորտուի, Կոիմբրայի և Պորտուգալիայի այլ քաղաքների փողոցներ՝ պահանջելով բնակարաններն ավելի մատչելի դարձնել և միջոցներ ձեռնարկել կյանքի թանկացումը զսպելու համար, հաղորդում է AFP-ն։
Լիսաբոնում երթի մասնակիցներն անցել են քաղաքի կենտրոնով, իսկ երեկոյան հավաքվել են Ռոսիու հրապարակում, որտեղ վրաններ են տեղադրել։ Բողոքավորները իշխանություններին կոչ են արել սահմանափակել անշարժ գույքի շուկայում սպեկուլյացիաները։ Որոշ պաստառների վրա պահանջ կար արգելել անշարժ գույքի ֆոնդերը, որոնց ցուցարարները մեղադրում են բնակարանի գների արհեստական բարձրացման մեջ։
Ակցիաները կազմակերպել է Պորտուգալիայի աշխատավորների համընդհանուր կոնֆեդերացիան (CGTP)՝ այլ արհմիութենական և բնակարանային շարժումների հետ համատեղ։ Մասնակիցները պահանջել են բարձրացնել աշխատավարձերն ու կենսաթոշակները, բարելավել պետական ծառայությունները և փոխել կառավարության տնտեսական քաղաքականությունը։
CGTP-ի գլխավոր քարտուղար Տիագու Օլիվեյրան հայտարարել է, որ բնակարանի, վառելիքի և սննդամթերքի գների աճը գնալով ավելի է անդրադառնում բնակչության առօրյա կյանքի վրա։ Նրա կարծիքով, բողոքները պետք է մարդկանց հնարավորություն տան արտահայտելու իրենց դժգոհությունը վարվող քաղաքականությունից։
Պորտուում մի քանի հազար մարդ անցել է Բատալյա հրապարակից մինչև Դոն Ժուան I-ի հրապարակ։ Կոիմբրայում ցույցը նույնպես նվիրված էր բնակարանի իրավունքին և տնային տնտեսությունների ծախսերի աճին։ Ակցիաները դարձել են եվրոպական երկրներում կյանքի թանկացման և բնակարանի անհասանելիության դեմ բողոքների ավելի լայն ալիքի մի մասը։