Ակնկալում եմ, որ գոնե գնալուց առաջ տիկին Մանասյանն ինչ որ դրական բան կանի
Fri, 23 Oct 2026 21:15:23 +0400
ՀՀ Մարդու իրավունքների պաշտպան Անահիտ Մանասյանը Ավստրալիա է մեկնել՝ մասնակցելու «զինված ուժերի օմբուդսմանական հաստատությունների 18-րդ միջազգային համաժողովին»։
Մեզ հետ զրույցում, իրավապաշտպան Նինա Կարապետյանցն անդրադառնալով թեմային, նշեց, որ Մանասյանի գործունեությանը վաղուց չի հետեւում, քանի որ վերջինս իր գործառույթներից բխող ոչ մի գործողություն չի իրականացնում։ «Անկեղծ ասած, ես իրեն վաղուց չեմ հետեւում, քանի որ ժամանակի կորուստ եմ համարում։ Մենք ներսում, այդ թվում՝ բանակի հետ կապված ունենք բազմաթիվ, բազմատեսակ խնդիրներ, որոնց օմբուդսմենը նաեւ պարտավորություն ունի արձագանքելու, բայց ոնց հասկանում ենք, ոչ մի շարժ, բացի ընդհանրական բնույթի դասագրքային տերմիններով լեկցիայի բովանդակությամբ զեկույցներից կամ հայտարարություններից, չի լինում, որոնք, ըստ էության, ոչինչ չեն փոխում»։
Դիտարկմանը, որ արդարացումներ կան, որ ՄԻՊ-ի կարգավիճակը շատ բաներ թույլ չի տալիս իրականացնել, Կարապետյանցը հակադարձեց․ «Ընդհակառակը, ՄԻՊ-ը անկախ սահմանադրական մարմին է, որը պետք է կարողանա իր մեջ ուժ գտնել գործող իշխանություններին՝ համաչափ իր ստատուսին, արձագանքել։ Ինչպես բոլոր օմբունդսմենների պարագայում, ակնկալում եմ, որ գոնե վերջում՝ գնալուց առաջ, տիկին Մանասյանն ինչ որ մի դրական բան կանի»։
Նա նշեց, որ բանակում կան բազմաթիվ սպանությունների ու ինքնասպանությունների դեպքեր, որոնց մասին եթե ՄԻՊ-ին հարցնենք, անպայման կասի, որ դրանց մասով հարցումներ է ուղարկում, քննարկում է․ «Եթե այդ գործողություններից որեւէ արդյունք չի հետեւում, ուրեմն կներեք, բայց սխալ եք անում ինչ որ մի բան, հետեւողական չեք, գուցե պետք է հանրային դաշտ տեղափոխել, բայց գիտեք՝ բոլորը վախենում են իրենց պաշտոնները կորցնելուց, դրա համար այդպիսի չխոսկան վիճակում են»։