Հոկտեմբերի 25-ին Արթիկ խոշորացված համայնքում կայացան Տեղական ինքնակառավարման մարմինների (ՏԻՄ) ընտրությունները։
​Ինչպես հայտնի է, ընտրությունների նախօրեին՝ «լռության օրը», անցավ ընդդիմադիր գործիչների նկատմամբ իրականացված ռեպրեսիաների ֆոնին։ Ընդդիմության քաղաքապետի և ավագանու թեկնածուները բերման ենթարկվեցին, ողջ օրը գտնվում էին իրավապահների ճնշման տակ, քննարկվում էր նրանց կալանավորման հարցը։ Ըստ քաղաքական գնահատականների՝ այս գործողություններն ունեին մեկ հստակ նպատակ. քվեարկությունից առաջ հոգեբանական ճնշում գործադրել ընդդիմադիր թևի վրա և ընտրողների շրջանում հիասթափություն առաջացնել ընդդիմության նկատմամբ։

Այնուամենայնիվ, ընտրությունները կայացան, թեպետ բուն քվեարկության օրը նույնպես արձանագրվեցին բազմաթիվ խախտումներ։ Չնայած դրան՝ ձայների նախնական հաշվարկից անմիջապես հետո իշխող «Քաղաքացիական պայմանագիր» կուսակցության թեկնածու Անանիկ Ոսկանյանն ու նրա թիմակիցներն արդեն իսկ բարձր տրամադրությամբ տոնում էին իրենց «հաղթանակը»։
​Անդրադառնալով քվեարկության պաշտոնական նախնական տվյալներին՝ Արթիկի նախկին քաղաքապետ Մխիթար Վարագյանի գլխավորած «Ազատ դեմոկրատներ» կուսակցությունը ստացել է քվեների 10,53%-ը (1840 ձայն)։ «Ապրելու երկիր» կուսակցությունը, որի ցուցակն առաջնորդում է գործարար Արթուր Աստոյանը, հավաքել է 8,84% (1545 ձայն), իսկ Սպորտի և երիտասարդության հարցերի նախկին նախարար Լևոն Վահրադյանի գլխավորած «Հայրենիք» կուսակցությունը ստացել է 5,82% (1017 ձայն)։
​Արթիկի համայնքապետարանի ավագանին բաղկացած է 27 մանդատից։ Ըստ մասնագիտական վերլուծությունների և ՀՀ Ընտրական օրենսգրքի կարգավորումների՝ եթե նախնական արդյունքները պահպանվեն, ընտրություններին մասնակցած բոլոր 4 քաղաքական ուժերն էլ կհաղթահարեն անցողիկ շեմը և կմտնեն նորընտիր ավագանու կազմ։
​

Նախնական հաշվարկներով մանդատները կբաշխվեն հետևյալ համամասնությամբ. «Քաղաքացիական պայմանագիր» կուսակցությունը կստանա 20 մանդատ, «Ազատ դեմոկրատները»՝ 3 մանդատ, իսկ «Ապրելու երկիր» և «Հայրենիք» կուսակցությունները՝ 2-ական մանդատ։