Ձեզ հետ ստորագրված «Շուշիի հռչակագրի» շնորհիվ․․․երեսպաշտ Ալիևը դիմել է Էրդողանին
Thu, 29 Oct 2026 15:00:33 +0400
Ադրբեջանի նախագահ Իլհամ Ալիևը շնորհավորել է Թուրքիայի նախագահ Ռեջեփ Թայիփ Էրդողանին Հանրապետության օրվա կապակցությամբ, հայտնում են ադրբեջանական ԶԼՄ-ները։
Ալիևի շնորհավորական ուղերձում նշվում է, որ Ադրբեջանը և Թուրքիան կապված են իրական բարեկամության և եղբայրության կապերով, որոնք դիմացել են պատմության փորձությանը․ «2021 թվականին Ձեզ հետ ստորագրված Շուշայի (խոսքը Արցախի օկուպացված Շուշի քաղաքի մասին է – խմբ․) հռչակագրի շնորհիվ մեր երկրների միջև հարաբերությունները հասել են ամենաբարձր՝ դաշնակցության մակարդակի՝ ձեռք բերելով որակապես նոր իմաստ և էություն»։
Հատկանշական է, որ վերջին շրջանում լարված են Բաքվի և Անկարայի հարաբերությունները․ Ադրբեջանը պնդում է, թե Թուրքիայի քաղաքական, հասարակական և մեդիա շրջանակները տեղեկատվական արշավ են իրականացնում ընդդեմ Ադրբեջանի։
Այս լարվածության ֆոնին Էրդողանն ազատել է իր խորհրդականներից մեկին՝ Բաքվի պնդմամբ հակաադրբեջանական ելույթների և հրապարակումների պատճառով։
Նույնպիսի պատրվակով հայտնի մի քանի անձ է ձերբակալվել, իսկ Ադրբեջանն իր հերթին ոչ ցանկալի անձ է հայտարարել և արգելել 31 թուրք հայտնի գործիչների, այդ թվում՝ պատգամավորների, կուսակցապետերի, լրագրողների, խմբագիրների և այլոց մուտքն իր երկիր։
Նաև հետախուզում հայտարարել ևս մի քանի թուրքերի։