Ազգային ժողովում խաշը եփեց, բակերից մեկում կերավ․․․
Sat, 31 Oct 2026 15:45:02 +0400
Ազգային ժողովում վերջին ծեծկռտուքից հետո, երբ իրար ոտ ու ձեռք կոտրեցին, փորոտիքին քացով հարվածեցին, արդեն զարմանալի չէ, որ այսօր Նիկոլ Փաշինյանը խաշի է նստել։ Գրում է․ «Այսպիսով, երեւանյան բակերից մեկում խաշի սեզոնը հայտարարեցինք բացված»։
Մարդը, փաստորեն, որոշել է՝ եթե երկրում ամեն ինչ խաշի է վերածել, պետք է գոնե իր եփած խաշն էլ վայելի։
Ազգային ժողովում խաշի համար ամեն ինչ արդեն պատրաստել էին․ ոտքերն ու ձեռքերը՝ ջարդած, փորոտիքը՝ մշակած։ Մնում էր միայն կաթսան դնել կրակին։ Խաշը, ինչպես գիտեք, երկար եփելու կերակուր է։ Դրա համար էլ երկու օր ուշացավ։
Փաստորեն, Ազգային ժողովում խաշը եփեց, բակերից մեկում կերավ․․․
Իսկ երբ նրա էջում մեկը գրել էր՝ «գելխեղդ», ես դա ընկալեցի որպես քաղաքական մեսիջ։ Երևի խաշի սեղանին գելխեղդի բացակայությունն էր զգացվում։
Մի խոսքով, խաշի սեզոնն ընթանում է խորհրդարանական օրակարգին համապատասխան։