Պահանջում են Վասակ Դարբինյանի ու Հովհաննես Մովսիսյանի հրաժարականը․ մանրամասներ
Tue, 03 Nov 2026 12:52:03 +0400
«Հայաքվե» ազգային քաղաքացիական նախաձեռնությունը բողոքի ակցիա է կազմակերպել Հանրային հեռարձակողի խորհրդի շենքի դիմաց՝ պահանջելով խորհրդի նախագահ Վասակ Դարբինյանի և Հանրային հեռուստաընկերության գործադիր տնօրեն Հովհաննես Մովսիսյանի հրաժարականները։
Ակցիայի ընթացքում նախաձեռնության հիմնադիր Ավետիք Չալաբյանը դժգոհություն է հայտնել Հանրային հեռուստաընկերության՝ սեպտեմբերի 27-ի եթերային քաղաքականության վերաբերյալ։ Նրա խոսքով՝ 44-օրյա պատերազմի մեկնարկի տարելիցին հեռուստաընկերությունը պատշաճ կերպով չի անդրադարձել այդ օրվա խորհրդին, չի կազմակերպել ուղիղ հեռարձակում Եռաբլուր զինվորական պանթեոնից, իսկ երեկոյան եթերում ցուցադրել է համերգային ծրագիր։ Չալաբյանի գնահատմամբ՝ նման բովանդակության հեռարձակումը վիրավորական է եղել պատերազմի հետևանքով կորստի ցավը կրող հասարակության համար։
Բողոքի մասնակիցները ձեռքին պահել են պաստառներ և ցուցանակներ՝ ընդգծելով, որ Հանրային հեռուստաընկերությունը պետք է ծառայի ամբողջ հասարակության շահերին, այլ ոչ թե որևէ քաղաքական ուժի։ Ակցիայի ընթացքում հնչել է նաև այն միտքը, որ Հանրայինը պատկանում է հանրությանը և չպետք է ընկալվի որպես իշխող «Քաղաքացիական պայմանագիր» կուսակցության լրատվական հարթակ։
Նախաձեռնությունը նաև պատրաստել է բաց նամակ-պահանջ, որի բովանդակությունը հավաքվածներին ներկայացրել է Ավետիք Չալաբյանը։
Նամակում «Հայաքվե»-ն իր դժգոհությունն է հայտնել սեպտեմբերի 27-ին հեռարձակված հաղորդման և Հանրային հեռուստաընկերության վերջին տարիների գործունեության վերաբերյալ։ Նախաձեռնության գնահատմամբ՝ այդ օրը եթեր հեռարձակված ծրագիրը հակասել է ազգային հիշողությանն ու հանրային զգայունությանը՝ անհարգալից վերաբերմունք դրսևորելով զոհվածների հիշատակի և հասարակության զգացմունքների նկատմամբ։
Փաստաթղթում նաև քննադատության է ենթարկվել Հանրային հեռուստաընկերության քաղաքական և տեղեկատվական բովանդակությունը։ Նամակի հեղինակները պնդում են, որ հարկատուների միջոցներով ֆինանսավորվող հեռարձակողը, որը պարտավոր է ապահովել անաչառություն, քաղաքական չեզոքություն և կարծիքների բազմազանություն, իր գործունեությամբ շեղվել է այդ սկզբունքներից և դարձել իշխանության շահերը սպասարկող հարթակ։
Առանձին անդրադարձ է կատարվել նախընտրական և ընտրական ժամանակահատվածներում քաղաքական ուժերի լուսաբանմանը։ «Հայաքվե»-ի պնդմամբ՝ հեռուստաընկերության եթերում իշխանական դիրքորոշումներն առավել մեծ ներկայացվածություն են ստացել, մինչդեռ ընդդիմադիր և այլընտրանքային տեսակետները բավարար չափով չեն ներկայացվել։ Որպես օրինակ՝ նամակում հիշատակվել են նաև Պետրոս Ղազարյանի հեղինակային հարցազրույցները, որոնց ընթացքում, նախաձեռնության գնահատմամբ, նկատելի է իշխանամետ մոտեցում։
Քննադատության է արժանացել նաև Ազգային ժողովի գործունեության լուսաբանումը։ Նամակի հեղինակները պնդում են, որ խորհրդարանական իրադարձությունները ներկայացվում են հիմնականում իշխող քաղաքական ուժի տեսանկյունից՝ սահմանափակ տեղ հատկացնելով ընդդիմության գործունեությանն ու այլընտրանքային դիրքորոշումներին։
Բաց նամակում անդրադարձ է եղել նաև եկեղեցական և ազգային-հոգևոր թեմաների լուսաբանմանը։ Նախաձեռնությունը մտահոգություն է հայտնել այն անձանց՝ Հանրայինի եթերում հայտնվելու կապակցությամբ, որոնց հայտարարություններն ու դիրքորոշումները, ըստ նամակի հեղինակների, պառակտում են հասարակությունը և թիրախավորում Հայ Առաքելական Եկեղեցին։
Վերոնշյալ պատճառաբանություններով «Հայաքվե»-ն պահանջում է Հանրային հեռարձակողի խորհրդի նախագահ Վասակ Դարբինյանի և Հանրային հեռուստաընկերության գործադիր տնօրեն Հովհաննես Մովսիսյանի հրաժարականները։ Նախաձեռնությունը նրանց պատասխանատու է համարում հեռուստաընկերության եթերային քաղաքականության, սեպտեմբերի 27-ի հաղորդման հեռարձակման և Հանրայինի գործունեության՝ իրենց գնահատմամբ, քաղաքականացված բնույթի համար։
Բացի ղեկավարների հրաժարականից՝ «Հայաքվե»-ն պահանջում է վերանայել Հանրային հեռուստաընկերության եթերային քաղաքականությունը և դրա գործունեությունը վերադարձնել հանրային շահի սպասարկմանը՝ ապահովելով բազմակարծություն, անաչառություն և հասարակության բոլոր շերտերի հավասար ներկայացվածություն։