Աննա Հակոբյանն ուզում է լրատվամիջոցներն իր հետ պոլեմիկայի մեջ մտնե՞ն
Tue, 03 Nov 2026 19:45:46 +0400
Աննա Հակոբյանն անդրադարձել է լրատվամիջոցներին և լրագրողներին, ըստ էության նրանց մեղադրելով կողմնակալ լինելու, թեմաներն ընտրովի լուսաբանելու համար: Սա առաջին դեպքը չէ, որ նախկին լրագրողը լրագրողներին թիրախ է դարձնում, և ասում է բաներ, որոնք ոչ մի աղերս չունեն իրականության հետ: Կան հրատապ թեմաներ, որոնց անդրադառնում են գրեթե բոլոր լրատվամիջոցները, և դա նորմալ է, քանի որ թեման ուշացող է, և կարող է ժամանակավրեպ դառնալ, սակայն կան թեմաներ, որոնց լրագրողները անդրադառնում են առանց օրվա հրամայականի, ըստ իրենց նախընտրության, և արդյոք տեղի՞ն է մեղադրել լրագրողներին միանման աշխատելու մեջ:
«Չորրորդ իշխանություն» պարբերականի երկարամյա խմբագիր Շողեր Մաթևոսյանին հարցրեցինք` համաձա՞յն է, նկատե՞լ է նման տենդենց, որ բոլոր լրագրողները, և լրատվամիջոցները համատարած լուսաբանեն նույն թեման, իսկ ինչ-որ թեմա կազմակերպված մերժեն, անտեսեն: Մաթևոսյանն ասաց, որ Աննա Հակոբյանի հայտարարություններին անդրադառնալն անիմաստ է, քանի որ նա հատուկ է ընտրում նման թեմաներ` լրագրողների հետ դիսկուրսի մեջ մտնելու համար. «Նա Սամվել Աշոտյանի հետ մասնակցեց փոդքասթի: Սամվելն ինչ հարց որ տվեց, նա խուսափեց պատասխաններից, և ասպարեզ բերեց միայն իր բռնության թեման` նեղ իմաստով, միայն ընտանեկան: Հիմա էլ ի՞նչ է ուզում: Եթերից եթեր է գնում, հարցեր են տալիս իրեն, չնայած ես չեմ հետևում նրա հարցազրույցներին, բայց այնպես չէ, որ իրեն հարթակ չեն տալիս լրատվամիջոցները: Չհասկացա այդ ռիլով ինչ էր ուզում ասել, ինչ է ուզում լրատվամիջոցներից: Ուզում է իր հետ պոլեմիկայի մեջ մտնե՞ն: Ես, անկեղծ ասած, չեմ էլ ուզում նրան պատասխանել, որովհետև իր խոսքում չկար ասելիք, դատարկություն էր: Ես իմ լրագրողներին ցուցումներ չեմ տվել, միշտ ազատ են եղել թեմաների հարցում: Ամբողջ օրը իր հարցազրույցից հատվածներ են հրապարակում համացանցում, էլ ի՞նչ է ուզում, չես հասկանում: Անվերջ նույն թեմայից է խոսում` ընտանեկան բռնություն, հիմա ի՞նչ է ուզում, որ լրագրողներն անեն: Ի՞նչ գրեն այդքան բռնության մասին, ինքն է ամենաշատը շփումներ ունենում բռնության ենթարկված կանանց հետ, ուզում եմ հասկանալ լրագրողները և լրատվամիջոցները ի՞նչ կարող են անել, որ չեն անում: Քրեական գործիքակազմերը չե՞ն աշխատում, լրագրողնե՞րը պիտի բռնությունը կանխեն, ի՞նչ է ուզում մեզանից: Իմաստ չկա նրա ասածներին անդրադառնալու: Նա լրատվամիջոցներին թիրախավորում է, որ իրեն պատասխանեն, բայց չարժե»: