Ո՞ւմ է ուղղված Դիլիջանը մաքուր պահելու կոչը
Wed, 04 Nov 2026 20:15:27 +0400
Հոկտեմբերի 25-ին Դիլիջանում կայացած ավագանու ընտրություններից 10 օր անցել է, սակայն Դիլիջան քաղաքում, միջպետական ավտոճանապարհի խաչմերուկում դեռևս փակցված է Դիլիջան համայնքի ղեկավար Դավիթ Սարգսյանի լուսանկարով նախընտրական մեծ պաստառ։ Դրա կողքին պատի վրա մեծ տառերով գրված է․ «Մաքուր պահենք Դիլիջանը»: Բայց այդ կոչն իրականում հենց համայնքապետին է ուղղված։ Դիլիջանում աղբահանությունը վատ է կատարվում, համայնքի աղբավայրը ցանկապատված չէ․ այնտեղ արածում, աղբանոցի թունավոր նյութերով սնվում են դիլիջանցիների կովերը։ Համայնքի աղբավայրում հաճախ, դիլիջանցիների կարծիքով՝ միտումնավոր բռնկվող հրդեհների ծուխը և ծանր հոտը թունավորում են գեղատեսիլ Աղստևի հովիտը, միջպետական ճանապարհը, աղբավայրի մոտակա Հաղարծին, Թեղուտ, Հովք գյուղերը։