Եթե իսկապես խաղաղության են ձգտում, դա պիտի անեն
Mon, 09 Nov 2026 11:45:54 +0400
«Ապրելու երկիր» կուսակցության համահիմնադիր Մանե Թանդիլյանի համոզմամբ՝ հայ ռազմագերիների և Բաքվում պահվող մյուս հայրենակիցների վերադարձը պետք է դառնա Հայաստանի և Ադրբեջանի միջև խաղաղության հաստատման գործընթացի առաջնային պայմաններից մեկը։
Լրագրողների հետ զրույցում Թանդիլյանն ընդգծել է, որ եթե կողմերն իսկապես ձգտում են խաղաղության, ապա դրա առաջին տեսանելի դրսևորումը պետք է լինի ադրբեջանական գերությունից հայերի վերադարձը։ Նրա խոսքով՝ Ադրբեջանը գերիներին չի պահում փոխանակման նպատակով, մինչդեռ Հայաստանի իշխանությունները նույնիսկ նման հարցերի քննարկման անհրաժեշտություն չեն տեսնում։
Թանդիլյանի գնահատմամբ՝ Բաքուն Հայաստանին չի ընկալում որպես հավասար գործընկեր, որի հետ ձգտում է կառուցել խաղաղ հարաբերություններ։ Նրա համոզմամբ՝ Ադրբեջանը Հայաստանի նկատմամբ ունի առավելապաշտական մոտեցում և փորձում է ստեղծված իրավիճակից հնարավորինս մեծ քաղաքական ու տարածքային շահ ստանալ։
Անդրադառնալով գերիների վերադարձի հեռանկարներին՝ կուսակցության համահիմնադիրը կարծիք է հայտնել, որ նրանց ազատ արձակումը կախված է լինելու նաև Հայաստանում իշխանության ղեկին գտնվող քաղաքական ուժից։