Իրավական ակտերի նախագծերի հրապարակման միասնական հարթակում հանրային քննարկման է դրվել աշխատանքի եւ բարեկեցության նախարարության կողմից մշակված նախագիծը, որով կառավարությունը նախատեսում է 2027 թվականի հունվարի 1-ից դադարեցնել պետական պաշտոններ եւ պետական ծառայության պաշտոններ զբաղեցնող անձանց, հանրակրթական դպրոցների, գրադարանների, թանգարանների, համերգային կազմակերպությունների, թատրոնների, սոցիալական սպասարկման հաստատությունների եւ որոշ այլ պետական կազմակերպությունների աշխատակիցների սոցիալական փաթեթի ֆինանսավորումը։
Նախագծի հիմնավորման մեջ փորձել են պարզաբանել, թե ինչու են առաջարկում դադարեցնել ծառայողների սոցիալական փաթեթի տրամադրումը, ովքեր են դրա շահառուները, ինչ կլինի արդեն կուտակված գումարների հետ, եւ որքան գումար կտնտեսի պետական բյուջեն։ Այսպես. կառավարության գնահատմամբ՝ դադարեցման արդյունքում տարեկան շուրջ 9.6-11.7 մլրդ դրամ կազատվի եւ կուղղվի պետական բյուջեի ընդհանուր ֆինանսավորմանը։ Այսինքն՝ չեն էլ թաքցնում, որ փողի խնդիր ունեն եւ որոշել են դա լուծել այս փաթեթները վերացնելու հաշվին:

Նախագծի հիմնավորման համաձայն՝ 2027 թվականին նախատեսվող պետական ծառայության վարձատրության բարեփոխումների իրականացման համար անհրաժեշտ կլինի շուրջ 30 մլրդ դրամ լրացուցիչ ֆինանսավորում։ Դա մոտ երեք անգամ գերազանցում է սոցիալական փաթեթի տարեկան ֆինանսավորման չափը։ Սա էլ նշանակում է, որ պետական որոշ ծառայողների աշխատավարձերը բարձրացնելու համար են բոլոր մյուսներին զրկում սոցիալական փաթեթից:

«Առողջության իրավունք» ՀԿ նախագահ Անուշ Պողոսյանը մեզ հետ զրույցում ասաց, որ դեռ ամիսներ առաջ էր խոսվում այդ նախագծի մասին, հիմա այն դրել են քննարկման, շուտով կհաստատեն եւ 2027 թվականի հունվարից կդադարեցնեն. «Քանի որ գործում է առողջության համընդհանուր ապահովագրության համակարգը, 200 հազար դրամ աշխատավարձ ստացող պետական աշխատողները դարձան համապարփակ ապահովագրություն ունեցող քաղաքացիներ: Ինչ են անում հիմա․ ասում են, որ սոցփաթեթն այլեւս չպետք է գործի: Բայց մենք գիտենք, որ սոցփաթեթը ոչ միայն առողջապահական երաշխիք է տալիս, նաեւ այլ արտոնություններ է տալիս, օրինակ՝ գումար հանգստի համար, որը քաղաքացիները կարողանում էին օգտագործել այլ նպատակներով: Եթե չեմ սխալվում՝ կրթության վճարներ անելու համար ունեն ապահովագրություն եւ այս նախագծով այդ ամենը դադարեցնում են: Հիմնավորում են, որ մենք ձեզ այնքան պարգեւավճարներ ենք տալիս… ուսուցիչներին ասում են, որ մենք ձեր աշխատավարձը բարձրացրել ենք, բայց մոնիտորինգ չեն անում, թե քանիսինն են բարձրացրել, կամ` քաղծառայության աշխատակիցներին ասում են` ձեզ պարգեւավճար ենք տվել, այլեւս դուք այդ 72 հազար դրամի կարիքը չունեք: Այդպես էլ հիմնավորում են, որ այս տարիներին ներդրվել են աշխատողների խրախուսման այլ մեխանիզմներ։ Մասնավորապես՝ ուսուցիչների կամավոր ատեստավորման, ուժային կառույցներում ատեստավորման արդյունքներով հավելավճարների տրամադրման, պետական ծառայողների բազային աշխատավարձի բարձրացման եւ աշխատանքի կատարողականի հիման վրա խրախուսման համակարգեր: Նաեւ ասում են, որ սոցիալական փաթեթի ֆինանսավորման դադարեցմամբ ազատվող միջոցները հնարավոր կլինի ավելի արդյունավետ բաշխել եւ ուղղել մարդկային կապիտալի զարգացմանն ու տնտեսական աճին միտված պետական ծրագրերին։ Ավելի անկեղծ կլիներ, որ գրեին՝ այդ գումարները, որ պահում ենք, կգան եւ կդառնան մեզ պարգեւավճարներ»: