Բայց մենք ինչ պանիկյոր ազգ ենք, չէ՞: Էն խեղճ աղջիկը քաղաքականություն մտնելու իր մտադրության մասին դեռ կես խոսք չի ասել, իսկ մենք արդեն խառնվել ենք իրար, ընկել պանիկայի մեջ, թե Աննա Հակոբյանը որոշել է մասնակցել Երևանի ընտրություններին: Մինչդեռ տեղի է ունեցել մի բան, որ ֆեյսբուքում հաճախ է պատահում: Ալեն Սիմոնյանը, այսպես ասած, «կիսվել» է Աննա Հակոբյանի «ավտոլայվով», որի մեջ տիկինը դժգոհում է երևանյան խցանումներից և, առանց անունը տալու, նաև Տիգրան Ավինյանի աշխատանքից:

Հանրության շրջանում, հասկանում ես, հարց էր առաջացել՝ Ալեն, դու ի՞նչ գործ ունես «ուրիշի կնգա» լայվերի և մանավանդ «ավտոլայվերի» հետ: Եվ ստացվել էր այնպես, որ ոչ այնքան Աննայի ավտոլայվն էր տպավորվել երևանցիների մեջ, որքան Ալեն Սիմոնյանի անմիջական մասնակցությունն այդ լայվի տարածման գործում: Խոսակցությունները, թե Աննան պատրաստվում է մասնակցել Երևանի ընտրություններին, կարելի է ասել, Ալեն Սիմոնյանի այդ քայլով էին պայմանավորված: Այս հարցին դեռ կանդրադառնամ, իսկ առայժմ երկու խոսք մեր ժողովրդի չտեսության մասին:

Ես չէի պատկերացնում, որ Երևանի բնակչության կեսից ավելին, այսինքն կանայք, այդքան ուշադիր են վարչապետի կնոջ (՞՞՞) հագուկապի, նստելու ձևի, կոկետության, շարժուձևի և անգամ բերանը բացել-փակելու մաներաների նկատմամբ: Ասա դե՝ կին է, խոսում է… էլ ի՞նչ եք կպել՝ դրա նստելու ձևը, ավտոյի մեջ ոտը ոտին գցելը, բառերը երկարացնելը… Մի տիկին նույնիսկ գրել էր՝ սա կոֆե էլ կխմի: ֆեյսբուքահայուհիներից գրեթե ոչ ոք ուշադրություն չէր դարձրել, թե ինչից է խոսում Աննա Հակոբյանը: Մինչդեռ թեման խիստ արդիական էր՝ երևանյան խցանումներ: Ճիշտ էր ասում տիկինը: Այդ խցանումներից, մինչև A կետից հասնի C կետը, մարդ կարող է ինֆարկտ ստանալ: Բա ինչքան գրագետ դրեց հարցը՝ այդ ինչի՞ց է, ասաց, որ աշխարհի 30-40 միլիոնանոց քաղաքներում, որտեղ մեքենաներն ավելի շատ են, այսպիսի խցանումներ չկան: Իսկ որ Աննա Հակոբյանն այս լայվով Երևանի «բեխաբար» քաղաքապետին էր քննադատում, ես մի փոքր ուշ հասկացա, երբ նա խոսեց կառուցապատման այն բազմամիլիոնանոց պայմանագրերի մասին, որոնց տակ «թույլատրել» բառը հայտնվում է արագ և հեշտությամբ, մինչդեռ տրանսպորտային կոլապսը որևէ կերպ չի հաղթահարվում: Իսկ տոնը, որով նա հեռակա մեղադրանքներ էր հնչեցնում, հուշեց ինձ, որ սա վերջնագիր է՝ ուղղված Ավինյանին:

Իսկ ինչո՞ւ էր հայտնի տիկնոջ ավտոլայվն այնքան հուզել ՀՀ ԱԽ քարտուղար Ալեն Սիմոնյանին: Ավելին ասեմ, ինչո՞ւ էր իշխանականներից միայն Ալեն Սիմոնյանն այդպես հուզվել: Բանն այն է, որ արդեն տևական ժամանակ է, ինչ մամուլում քննարկվում է Երևանի քաղաքապետի աթոռի շուրջ Ալեն Սիմոնյան-Տիգրան Ավինյան հակամարտության թեման: Թերթերը գրում են, որ այս երկուսի միջև նույնիսկ ներկուսակցական դեբատներ կան, թիմը մտածում է՝ ինչ անել, ում թեկնածությունը պաշտպանել Երևանի ընտրություններում (հնարավոր է արտահերթ): Եվ ահա, Աննայի լայվից և այդ լայվով Ալենի «կիսվելուց» հետո որոշ ջրեր են պարզվել ՔՊ-շնիկների շարքերում: Ըստ մեր տեղեկությունների՝ ՔՊ-ի ջոջակազմը կարծում է, որ Ալենն է հաջորդ քաղաքապետը: Նույնիսկ քաղաքական նոր ուժի անունն են մտածել՝ «Ա&Ա» (Ալեն և Աննա) դաշինք: Մինչդեռ իրենց համառությամբ նրանց չեն զիջում նաև Ավինյանի կողմնակիցները, որոնք Ալենի աշխուժացումը բացատրում են Նիկոլ Փաշինյանի՝ այս հարցով զբզղվելու դժվարություններով: ԵՄ-ԵԱՏՄ հանրաքվե, Սահմանադրական հանրաքվե, ԱԺ արտահերթ ընտրություններ: Քանի՞ կտոր լինի վարչապետը: Ահա և Ալենն ու Աննան լայվ են մտել, որ, եթե հանկարծ Երևանի արտահերթ ընտրությունների կարիք լինի, իրենք առաջինը ներկայանան ԿԸՀ:
Իսկ Ավինյա՞նը… Որքան էլ զարմանալի է, Ավինյանի հետագա ճակատագիրը ֆեյսբուքահայությանն այնքան էլ չի հետաքրքրում… Նիկոլից ավելի ստախոս, Նիկոլից ավելի ապալեգիտիմ, Նիկոլից ավելի ձախողակ: Նիկոլից վերան՝ ոչ մի խոստում չի կատարել: Եվ, քանի որ Ալեն Սիմոնյանն էլ մի բարի պտուղ չէ, հանրությունը կենտրոնացել է Աննայի վրա և համարում է, որ «Ա&Ա»-ն կհաղթի, եթե դաշինքի ցուցակը գլխավորի Աննա Հակոբյանը: