Արսեն Գևորգյանի նկատմամբ իշխանությունների վերաբերմունքը պայմանավորված էր ոչ թե պարզապես նրա անձի շուրջ առաջացած որևէ խնդրով, այլ ընդդիմադիր քաղաքական գործունեությամբ։ Այս համոզմունքն է հայտնել Ձյունիկ Աղաջանյանը՝ իշխանությունների կողմից քաղաքական հետապնդումների թեմայով հրատապ ասուլիսի ընթացքում։

Նրա խոսքով՝ Գևորգյանը իշխանությունների ուշադրության կենտրոնում հայտնվեց այն բանից հետո, երբ համայնքային ընտրություններին մասնակցելու որոշում կայացրեց որպես ընդդիմադիր թեկնածու։ Աղաջանյանի գնահատմամբ՝ ստեղծված իրավիճակը ցույց է տալիս, որ իշխանությունների համար այլևս անընդունելի է դարձել ցանկացած քաղաքական դիրքորոշում, որը չի համընկնում իրենց վարած քաղաքականության հետ։

Աղաջանյանը շեշտել է, որ ընդդիմադիր հայացքներ ունենալը և ազատ կարծիք արտահայտելը մարդու հիմնարար իրավունքներից են։ Հետևաբար, երբ անձի նկատմամբ մեղադրանքներ են առաջադրվում նրա քաղաքական դիրքորոշման պատճառով, դրանք, ըստ նրա, ներկայացվում են այլ հանցագործությունների անվան տակ՝ առանց բավարար փաստական հիմքերի։ Նրա համոզմամբ՝ նման գործերի հետևում հստակ քաղաքական նպատակներ են կանգնած։

Աղաջանյանի դիտարկմամբ՝ հատկապես նախընտրական շրջանում իշխանությունները փորձում են վերացնել քաղաքական մրցակցությունը՝ խոչընդոտելով ընդդիմադիր թեկնածուների մասնակցությունն ու առաջխաղացումը։ Այդ նպատակով, նրա խոսքով, կիրառվող հիմնական գործիքներից մեկը կալանքն է, որը փաստացի վերածվում է պատժամիջոցի՝ իշխանություններին հակադրվելու, այլընտրանքային տեսակետ ներկայացնելու և ազգային դիրքերից հանդես գալու համար։

Նա նաև նշել է, որ նման գործողությունների հետևանքով հասարակության մեջ ձևավորվում է վախի մթնոլորտ։ Աղաջանյանի գնահատմամբ՝ իշխանություններին անհրաժեշտ է այդպիսի միջավայր ստեղծել՝ իրենց ստանձնած քաղաքական պարտավորություններն իրականացնելու համար։ Նա պնդել է, որ իշխանությունների քաղաքական ծրագրերին խոչընդոտում են սկզբունքային դիրքորոշում ունեցող մարդիկ, և նրանց լռեցնելու նպատակով էլ կիրառվում են ճնշման տարբեր մեթոդներ։