«Հրապարակ»․ Կազատեն՝ թող ազատեն, ջանները սաղ լինի
Fri, 13 Nov 2026 10:25:40 +0400
Հոկտեմբերի 25-ին կայացած Արտաշատ համայնքի ՏԻՄ ընտրությունների արդյունքում ավագանու 33 մանդատները բաշխվել են հետեւյալ կերպ․ ՔՊ՝ 28 մանդատ, ՀՅԴ՝ 4, «Նոր դարաշրջան»՝ 1: Արտաշատի համայնքապետարանում դեկտեմբերին կկայանա նորընտիր ավագանու անդրանիկ նիստը, որի ժամանակ էլ համայնքապետ կընտրվի: Թեեւ առանձնահատուկ ընտրելու բան չկա, որովհետեւ ՔՊ-ն մեծամասնություն ունի եւ ոչ մեկի կարիքը չունի թեկնածու ընտրելու հարցում:
Սակայն համայնքային ՔՊ-ում տարաձայնություններ կան: ՔՊ-ի նախընտրական ցուցակում ակնկալվել է, որ երկրորդ համարը պետք է համայնքապետի տեղակալ Հրայր Հակոբջանյանը լինի, որը նաեւ ավագանու անդամ է, նախկինում եղել է Արարատի մարզի Լանջազատ համայնքի ղեկավարը, Հանրապետական կուսակցության կողմից անգամ 2017 եւ 18 թվականներին պատգամավորության թեկնածու է առաջադրվել, հետո ճամբարափոխ եղել եւ անցել ՔՊ-ականների կողմը:
Բայց ՔՊ-ի ՏԻՄ ընտրացուցակի երկրորդ հորիզոնականում հայտնվեց համայնքապետի խորհրդական Խորեն Ուստյանի անունը: Մեզ պատմեցին, որ համայնքի ղեկավարի տեղակալ Հրայր Հակոբջանյանը ցանկացել է առաձին կուսակցությամբ առաջադրվել, սակայն նրան թույլ չեն տվել եւ առաջիկայում էլ հնարավոր է Հակոբջանյանին ազատեն զբաղեցրած պաշտոնից, ու համայնքապետի տեղակալ նշանակվի խորհրդական Խորեն Ուստյանը:
Հրայր Հակոբջանյանին հարցրինք՝ Ձեր անունը ներառված չէր ՔՊ-ի կողմից ՏԻՄ ընտրությունների ցուցակում, տարաձայնություններ կա՞ն Ձեր եւ քաղաքապետի միջեւ, թե՞ Դուք չեք ցանկացել մասնակցել ընտրություններին։ «Պարտադիր չէ, որ ես ինչ-որ ավագանու անդամ լինեմ կամ ինչ-որ ցուցակում լինեմ: Ես 20 տարի է՝ համայնքային ծառայությունում եմ, երկար տարիներ համայնքի ղեկավար եմ եղել: Ես ոչ մի տարաձայնություն չունեմ քաղաքապետի հետ, ՔՊ կուսակցության մեջ չեմ, հիմա էլ իմ կաբինետում եմ` աշխատում եմ»: Հարցրինք` ասում են, թե նոր ավագանու անդրանիկ նիստից հետո Ձեզ աշխատանքից ազատելու են։ «Էդպիսի բաներ իմ մտքով չեն անցել, կազատեն՝ թող ազատեն, ջանները սաղ լինի»: Ճի՞շտ է, որ Դուք ցանկացել եք այլ ցուցակով ինքնուրույն առաջադրվել, բայց թույլ չեն տվել, ճնշել են Ձեզ։ «Ո՞վ է այդպիսի բաներ Ձեզ ասել, չէ` նման բան չկա, եթե ճիշտ լիներ, մենք կմասնակցեինք ընտրություններին: Ինձ հնարավոր էլ չէ ճնշել, որովհետեւ ես ճնշվող տեսակ չեմ, համենայնդեպս, ես թույլ չեմ տվել եւ թույլ չեմ տա ինձ ճնշել»: