Ի՞նչ է պահանջում Պուտինը ՆԱՏՕ-ից․ Հայաստանին էլ է վերաբերվում
Sat, 14 Nov 2026 14:07:27 +0400
Ուկրաինայի դեմ պատերազմը դադարեցնելու համար Ռուսաստանը պահանջեց, որ ՆԱՏՕ-ն վերադառնա 1997 թվականի սահմաններին և դադարեցնի Կիևին ցուցաբերվող օգնությունը։
Ըստ The New York Times-ի՝ Կրեմլի դիրքորոշումը ներկայացնող փաստաթուղթը ներկայացվել է նոյեմբերի 10-ին Աբու Դաբիում Ուկրաինայի, ԱՄՆ-ի և Ռուսաստանի ներկայացուցիչների մասնակցությամբ կայացած բանակցությունների ժամանակ։ Դրա իսկությունը հաստատել է դիվանագիտական խորհրդակցություններին ծանոթ աղբյուրը, նշել է թերթը։
Նշվում է, որ փաստաթուղթը, ըստ էության, կրկնում է Մոսկվայի կողմից 2021 թվականի դեկտեմբերին ներկայացված պահանջները։ Մասնավորապես, Ռուսաստանը պնդում է դադարեցնել ՆԱՏՕ-ի հետագա ընդլայնումը և դուրս բերել Դաշինքի զորքերն ու ռազմական բազաները այն դիրքերից, որոնք նրանք զբաղեցրել են մինչև 1997 թվականը։ Սա ներառում է նաև Լեհաստանում և Բալթյան երկրներում ռազմական ներկայությունը։
Ավելին, Մոսկվան պահանջում է արգելել ՆԱՏՕ-ի բոլոր ռազմական գործունեությունը Ուկրաինայում, Արևելյան Եվրոպայում, Կենտրոնական Ասիայում և Հարավային Կովկասում։
Առանձին կետը վերաբերում է Կիևին արևմտյան զենքի և ռազմական տեխնիկայի մատակարարման դադարեցմանը։