Ու՞մ է տեսնում ՈւԵՖԱ-ն ՖԻՖԱ-ի նախագահի պաշտոնում․ ինտրիգ կա
Tue, 17 Nov 2026 11:30:00 +0400
ՈՒԵՖԱ-ն միաձայն հաստատել է Ֆրանսիայի ֆուտբոլի ֆեդերացիայի նախագահ Ֆիլիպ Դիալոյի թեկնածությունը ՖԻՖԱ-ի նախագահի պաշտոնում։ Այս մասին հայտարարվել է կազմակերպության հայտարարության մեջ։
63-ամյա պաշտոնյան ընդունել է ՖԻՖԱ-ի նախագահական ընտրություններում իր թեկնածության առաջադրումը․ ընտրությունները տեղի կունենան 2027 թվականի մարտին։ Նրա թեկնածությունը, ինչպես սպասվում է, պաշտոնապես կհաստատվի Ֆրանսիայի ֆեդերացիայի գործադիր կոմիտեի կողմից նոյեմբերի 17-ին նախատեսված նիստում։
Դիալոն գլխավորում է Ֆրանսիայի ֆուտբոլի ֆեդերացիան 2023 թվականից։ Մինչ այդ նա զբաղեցրել է կազմակերպության փոխնախագահի և գլխավոր ֆինանսական տնօրենի պաշտոնները, ինչպես նաև աշխատել է Ֆրանսիայի պրոֆեսիոնալ ֆուտբոլի կառավարման մարմիններում։ Նույն թվականին նա միացել է ՈՒԵՖԱ-ի գործադիր կոմիտեին։
Եվրոպական ասոցիացիաները շեշտել են համաշխարհային ֆուտբոլային հանրության շրջանակներում միասնության և վստահության վերականգնման անհրաժեշտությունը։ Նրանք համոզված են, որ ՖԻՖԱ-ն պետք է կենտրոնանա ֆուտբոլի զարգացման վրա աշխարհի բոլոր տարածաշրջաններում, պահպանի կառավարման բարձր չափանիշները և սերտորեն համագործակցի ազգային ասոցիացիաների և կոնֆեդերացիաների հետ։
Ավելացնենք, որ թեկնածուները կարող են իրենց առաջադրել ՖԻՖԱ-ի առաջիկա նախագահական ընտրություններում մինչև այս տարվա նոյեմբերի 18-ը։ Այժմ իրենց մասնակցության մասին հայտարարել են ճապոնացի նախկին ֆուտբոլիստ Կոզո Տաշիման և «Տոտենհեմի» նախկին պաշտպան Ռամոն Վեգան։
Արսեն Վենգերի թեկնածությունը երկար ժամանակ քննարկվում էր, մի քանի բարձրաստիճան ֆուտբոլային գործիչներ նրան կոչ էին անում դիմել։ Սակայն երեկ հայտարարվեց, որ «Արսենալի» նախկին մարզիչը հրաժարվել է այս տարբերակից։
Հիշեցնենք, որ ՖԻՖԱ-ի հաջորդ նախագահի ընտրությունները տեղի կունենան 2027 թվականի մարտի 18-ին Մարոկկոյում։
Ջանի Ինֆանտինոն որոշել է առաջադրվել։
FairSquare իրավապաշտպան կազմակերպությունը նախկինում հայտարարել էր, որ Ինֆանտինոյի մասնակցությունն այս ընտրություններին անօրինական է, քանի որ կարծում է, որ սա նրա չորրորդ ժամկետն է, ինչը խախտում է ՖԻՖԱ-ի կանոնադրությունը։