Նոր ուշագրավ մանրամասներ Շաքիի դեպքից

Նոր ուշագրավ մանրամասներ Շաքիի դեպքից

Tue, 17 Nov 2026 11:32:03 +0400


Հայաստանի պետական սահմանն ապօրինի հատած և Սյունիքի մարզի Շաքի բնակավայրում կնոջը հրազենային ծանր վնասվածք հասցրած Ադրբեջանի քաղաքացի, զինծառայող Նասիմի Ռահիմ Օղլի Մուսաևի վերաբերյալ քրեական գործը մուտք է եղել դատարան։ Գործը մակագրվել է Սյունիքի մարզի դատարանի դատավոր Հրաչ Դաջունցին։

Ըստ մեղադրական եզրակացության՝ Նասիմի Մուսաևը 2026 թվականի սեպտեմբերի 26-ին՝ ժամը 20։00-ից 22։00-ն ընկած ժամանակահատվածում, Ադրբեջանի զինված ուժերի ծառայության մեջ գտնվելիս, ապօրինի հատել է Հայաստանի պետական սահմանը՝ Սյունիքի մարզի Իշխանասար բնակավայրի վարչական տարածքով։

Նա իր հետ Հայաստան է տեղափոխել «AKM» տեսակի ինքնաձիգ, 140 մարտական և 10 անգնդակ փամփուշտ, ինչպես նաև սվին-դանակ։ Զենքն ու ռազմամթերքը Հայաստան է տեղափոխել առանց մաքսային հսկողության, իսկ ՀՀ տարածքում ապօրինի պահել և կրել է դրանք։

Մուտք գործելուց հետո Մուսաևը հասել է Սիսիան համայնքի Շաքի բնակավայր։ Մեղադրանքի համաձայն՝ սեպտեմբերի 30-ից հոկտեմբերի 1-ն ընկած ժամանակահատվածում նա ապօրինի մուտք է գործել 6-րդ փողոցի 20-րդ տուն և այնտեղից հափշտակել բջջային հեռախոս, սմարթ ժամացույց, տաբատ, 9 հազար դրամ, բանկային քարտ և երկու ձախ կոշիկ։ Տան սեփականատիրոջը՝ Անի Ավետիսյանին, պատճառվել է ընդհանուր 26 հազար դրամի գույքային վնաս։

Հոկտեմբերի 1-ին՝ ժամը 14։00-ի սահմաններում, տուն են վերադարձել այնտեղ բնակվող անչափահասներ Ռոզի և Քաջիկ Ավետիսյանները։ Ըստ մեղադրանքի՝ Մուսաևը ինքնաձիգով սպառնացել է նրանց, ստիպել նստել հյուրասենյակի բազմոցին, հանձնել իրենց բջջային հեռախոսները և մնալ իր մատնանշած վայրում՝ ապօրինաբար զրկելով ազատ տեղաշարժվելու և տնից դուրս գալու հնարավորությունից։

Ավելի ուշ տուն է ժամանել նաև Անի Ավետիսյանը։ Մեղադրական եզրակացության համաձայն՝ Մուսաևը նրա առողջությանը ծանր վնաս պատճառելու դիտավորությամբ, զենքի գործադրմամբ և այլ անձանց կյանքի ու առողջության համար վտանգավոր եղանակով ինքնաձիգից վեց կրակոց է արձակել։ Կրակոցներից մեկը դիպել է Անի Ավետիսյանի ձախ ազդրին։

Դրանից հետո Մուսաևը կնոջը գցել է մահճակալին և բազմաթիվ հարվածներ հասցրել մարմնի տարբեր հատվածներին։ Արդյունքում Անի Ավետիսյանը ստացել է կյանքի համար վտանգավոր ծանր վնասվածքներ, այդ թվում՝ ազդոսկրի բազմաբեկոր կոտրվածք, մկանների և նյարդանոթային խրձի վնասում, ինչպես նաև ձեռքի մատների ծանր վնասվածքներ։

Դեպքից հետո Մուսաևը դիմել է փախուստի և թաքնվել Շաքի բնակավայրի 6-րդ փողոցի 26-րդ տան հարակից անասնագոմում։ Նույն օրը՝ ժամը 16։15-ին, նա հայտնաբերվել և ձերբակալվել է իրավապահ մարմինների ծառայողների կողմից։

© 2026 Հրապարակ

Source: Hraparak

Hraparak.am

Share
Published by
Hraparak.am

Recent Posts

Ու՞մ է տեսնում ՈւԵՖԱ-ն ՖԻՖԱ-ի նախագահի պաշտոնում․ ինտրիգ կա

Ու՞մ է տեսնում ՈւԵՖԱ-ն ՖԻՖԱ-ի նախագահի պաշտոնում․ ինտրիգ կա Tue, 17 Nov 2026 11:30:00 +0400…

15 րոպե ago

Սև ծովում Ադրբեջանի և Թուրքիայի քաղաքացիներով նավ է խորտակվել

Սև ծովում Ադրբեջանի և Թուրքիայի քաղաքացիներով նավ է խորտակվել Tue, 17 Nov 2026 11:23:56 +0400…

21 րոպե ago

Մեր ունեցվածքը խլում են. Ի՞նչ խնդրանքով դիմեցին քաղաքացիները Ղազինյանին

Մեր ունեցվածքը խլում են. Ի՞նչ խնդրանքով դիմեցին քաղաքացիները Ղազինյանին Tue, 17 Nov 2026 11:22:01 +0400…

23 րոպե ago

Ծնողները միաբերան ասել են՝ խնդրում ենք այս մարդուն պահեք․ Ավինյանը՝ երաժշտական դպրոցի տնօրենի մասին

Ծնողները միաբերան ասել են՝ խնդրում ենք այս մարդուն պահեք․ Ավինյանը՝ երաժշտական դպրոցի տնօրենի մասին Tue,…

26 րոպե ago

«Հրապարակ». Էժանագին շոու է՝ հանրության ականջներից լապշաներ կախելու համար

«Հրապարակ». Էժանագին շոու է՝ հանրության ականջներից լապշաներ կախելու համար Tue, 17 Nov 2026 11:15:01 +0400…

30 րոպե ago

Գնացքը գնացել ա, կլինի 1 րոպե թե 5. Դատավոր Բալայանը բարկացավ

Գնացքը գնացել ա, կլինի 1 րոպե թե 5. Դատավոր Բալայանը բարկացավ Tue, 17 Nov 2026…

35 րոպե ago