Այն խաղաղությունը, որն իրենք են առաջարկում մեզ, ճիշտ այն խաղաղությունն է, որն Արցախում կա
Thu, 19 Nov 2026 15:14:45 +0400
ԱԺ «Հայաստան» խմբակցության պատգամավոր Քրիստինե Վարդանյանը քննադատել է արտգործնախարար Արարատ Միրզոյանի՝ խաղաղության վերաբերյալ արած հայտարարությունը՝ այն համարելով Նիկոլ Փաշինյանի իշխանության պատկերացրած խաղաղության բնութագրական արտահայտություն։
Լրագրողների հետ զրույցում Վարդանյանը նշել է, որ Միրզոյանի խոսքերը հիշեցնում են Արցախում հաստատված իրավիճակը, որը, նրա գնահատմամբ, խաղաղություն է առանց հայերի։
Պատգամավորի խոսքով՝ խոսքը ոչ թե իրական խաղաղության, այլ գերեզմանային լռության մասին է։ Նա ընդգծել է, որ գերեզմանում ևս խաղաղություն է տիրում, սակայն հարց է բարձրացրել՝ արդյոք Հայաստանին հենց այդպիսի խաղաղություն է անհրաժեշտ։
«Ավելի բնութագրական տերմին Նիկոլ Փաշինյանի խաղաղությանը, քան երեկ հորինեց Արարատ Միրզոյանը, չկա»,- ասել է Վարդանյանը։
Հիշեցնենք, որ Ազգային ժողովում կառավարության անդամների հետ հարցուպատասխանի ընթացքում Արարատ Միրզոյանը, դիմելով ընդդիմադիր պատգամավորներին, հայտարարել էր. «Խաղաղություն լինելու է, մեռնեք էլ՝ լինելու է»։
«Այն խաղաղությանը, որն իրենք են առաջարկում մեզ, ճիշտ այն խաղաղությունն է, որն Արցախում կա»,- ասել է նա: