Մեր սկզբունքը լիբերալ տնտեսությունն է և պահպանողական հասարակական մոտեցումը

Mon, 10 Aug 2026 11:56:09 +0400

«Ուժեղ Հայաստան» խմբակցության ղեկավար Նարեկ Կարապետյանը Ազգային ժողովում իր ելույթի ընթացքում անդրադարձել է հայրենիքի վերաբերյալ քաղաքական տարբեր ընկալումներին։ Նրա խոսքով՝ այս հարցում առկա են երկու հիմնական մոտեցումներ․ առաջինը պատմական հայրենիքը որպես ազգային նպատակ դիտարկող մաքսիմալիստական մոտեցումն է, իսկ մյուսը՝ վարչապետ Նիկոլ Փաշինյանի առաջ քաշած «իրական Հայաստան» հայեցակարգը։

Կարապետյանի խոսքով՝ «Ուժեղ Հայաստանի» դիրքորոշումը հստակ է․ Հայաստանը որևէ պետության նկատմամբ տարածքային պահանջներ չունի, սակայն դա չի նշանակում, որ պետք է հրաժարվել պատմական հայրենիքի գաղափարից։

Նա ընդգծեց, որ պատմական հայրենիքը նաև պատմագիտության և մշակութաբանության ուսումնասիրության կարևոր ուղղություն է։ Ըստ նրա՝ պետությունը պետք է ակտիվորեն զբաղվի պատմության ուսումնասիրությամբ և այդ գիտելիքը հաջորդ սերունդներին փոխանցելով, քանի որ դա ազգային ինքնության պահպանման կարևոր բաղադրիչ է։

Կարապետյանն անդրադարձավ նաև Հայաստանի սոցիալ-ժողովրդագրական խնդիրներին՝ նշելով, որ հասարակության զարգացման հարցում իրենց քաղաքական ուժը կողմնակից է պահպանողական մոտեցումների։

Նրա գնահատմամբ՝ ծնելիության մակարդակի բարձրացման խնդիրը առավել արդյունավետ լուծվում է այն երկրներում, որոնք վարում են պահպանողական քաղաքականություն։

Խմբակցության ղեկավարը խոսեց նաև տնտեսական քաղաքականության մասին՝ ներկայացնելով «Ուժեղ Հայաստանի» մոտեցումը։

«Մեր սկզբունքը լիբերալ տնտեսական մոդելն է և պահպանողական հասարակական մոտեցումը»,- նշել է Կարապետյանը։