Օնլայն վաճառքը ԵԱՏՄ-ում կմտնի նոր փուլ
Thu, 19 Mar 2026 11:55:08 +0400
Եվրասիական տնտեսական միության շրջանակում նախատեսվում է կարգավորել էլեկտրոնային առևտրի ոլորտում գործող ընկերությունների գործունեությունը, որոնք զբաղվում են սպառողներին հեռավար եղանակով ապրանքների առաջարկմամբ և վաճառքով։ Այս նպատակով Հայաստանի կառավարությունը իր հերթական նիստում հավանություն է տվել «Եվրասիական տնտեսական միությունում ապրանքների էլեկտրոնային առևտրի մասին» համաձայնագրի ստորագրման առաջարկությանը։
Նշված համաձայնագիրը նախապես հաստատվել է Եվրասիական տնտեսական հանձնաժողովի խորհրդի կողմից՝ 2025 թվականին, և փոխանցվել անդամ պետություններին՝ անհրաժեշտ ներպետական գործընթացներն իրականացնելու և ստորագրման փուլին անցնելու համար։
Փաստաթուղթը միտված է ապահովելու ԵԱՏՄ ներքին շուկայում էլեկտրոնային առևտրի բնականոն զարգացումը։ Այն սահմանում է մասնակիցների իրավունքների և օրինական շահերի պաշտպանությունը, ինչպես նաև հստակեցնում է նրանց միջև համագործակցության և փոխգործակցության կանոնները։
Բացի այդ, համաձայնագիրը նպատակ ունի ձևավորել բարենպաստ միջավայր՝ միության շրջանակում էլեկտրոնային առևտրի ընդլայնման համար։