«Գագիկ Ծառուկյանը հայտարարել է, որ ինքը չի հավակնում վարչպետի պաշտոնին, եւ դա ինձ համար շատ կարևոր է». Ատոմ Մարգարյան

Thu, 19 Mar 2026 23:15:30 +0400

Տնտեսագիտության թեկնածու, պրոֆեսոր Ատոմ Մարգարյանը ֆեյսբուքյան իր էջի միջոցով տեղեկացրել է, որ միանում է «Առաջարկ Հայաստանին» նախագծին։ ««Առաջարկ Հայաստանին» նախագիծը բաց, ազատ, ներկուսակցական հարթակ է, որը կարող է համադրել ու գեներացնել արդյունավետ ծրագրեր մեր երկրի բազմաբնույթ խնդիրների լուծման ուղղությամբ», – գրել է Ատոմ Մարգարյանը։

– Ինչո՞ւ Գագիկ Ծառուկյանին, արդյո՞ք սա նշանակում է, որ ընտրությունների ժամանակ աջակցելու եք Ծառուկյանին, գուցե, միանալո՞ւ եք նրան:

– Ես Ծառուկյանին չեմ միացել: Դա «Առաջարկ Հայաստանին» ծրագիրն է, դա մասնագիտական, փորձագիտական հարթակ է: Թե հետո ինչ կլինի, ես չեմ կարող ասել: Գագիկ Ծառուկյանին եթե ես միանայի, կմիանայի «Բարգավաճ Հայաստան» կուսակցությանը, բայց դրանք տարբեր բաներ են, սա է հարցը:

– Այսինքն, սա նախընտրական, քաղաքական տրամաբանություն չունի՞, այս Ձեր քայլը:

– Այո, դա մասնագիտական հարթակ է, դա որպես ՀԿ է գրանցված եւ վերջ: Այդ ՀԿ-ի անդամների մեծ մասը, ում հետ ես շփվում եմ, անկուսակցականներ են, ու հետագայում ինչ կլինի, ես չգիտեմ: Գագիկ Ծառուկյանը հայտարարել է, որ ինքը չի հավակնում վարչպետի պաշտոնին, եւ դա ինձ համար շատ կարևոր է: Այսինքն, նա գնահատում է պրոֆեսիոնալներին, այդ պատճառով այս հարթակը ստեղծվել է, եւ դրանով է ինձ համար նախընտրելի: Այլապես, ես կարող էի մտնել մի կուսակցության մեջ, այդ թվում նաեւ «Բարգավաճի»: Բայց ինձ համար կարևոր է, որ այդ ծրագիրը պրոֆեսիոնալ լինի, իսկ թե ով ինչպես այն կօգտագործի, ինչ քաղաքական պրոցես կգնա, դա հետագայի խնդիր է: Հնարավոր է, կոալիցիա լինի, կամ այլ ինչ որ ձեւաչափ:

– Եթե հետագայում Գագիկ Ծառուկյանը միանա ինչ որ քաղաքական ուժի, ենթադրենք, Սամվել Կարապետյանին, կամ Քոչարյանին, դուք նրա հե՞տ եք լինելու:

– Ես այս պահին ոչինչ չեմ կարող ասել, գուշակություններ ես չեմ անում ու չեմ ցանկանում անել: