ՀՅԴ-ին քաղաքական դաշտում կողմնորոշվելու ցուցում է տվել ոչ անհայտ Սամվել Ֆարմանյանը: Իր կարծիքով՝ բան է հուշել ՀՅԴ-ին: Սամվել Ֆարմանյանը, որ երբեք ընդդիմադիր չի եղել, էլ ընդդիմություն, էլ իշխանություն, էլ իշխանության մաս եղած ՀՅԴ-ին խորհուրդներ է տվել, թե ինչպես էր պետք մասնակցել առաջիկա ընտրություններին, նաև կանխագուշակություններ արել, թե ինչ տեղի կունենա ՀՅԴ-ի հետ, եթե «Հայաստան» դաշինքը չհաղթահարի խորհրդարան անցնելու 8 տոկոսի շեմը: Իր ֆեյսբուքյան տնամերձում այսպիսի բան է երկնել հայտնի ՀՀԿ-ական Սամվել Ֆարմանյանը. «ՀՅԴ-ն դառնալու է արտախորհրդարանական ուժ, ու չկասկածեք, որ «խաղաղության» դարաշրջանի թելադրանքով վերարտադրված Նիկոլն առանց աչքը թարթելու կասեցնելու է ՀՅԴ-ի (ու ոչ միայն ՀՅԴ-ի) գործունեությունը Հայաստանում: Վերարտադրված Նիկոլն իր արտաքին տերերին «խաղաղության» ճանապարհին նման շքեղ նվերներ անելու կարիք շատ է ունենալու: Խորհրդարանական ուժ լինելու պարագայում, հասկանում եք, շա՜տ բարդ էր լինելու դա անել»: Եվ հարց է տվել ՀՅԴ-ին. «դուք ի՞նչ եք անում»:

Պարոն Ֆարմանյան, մենք անում ենք այն, ինչ անում ենք: Նույնը կասեի նաև ՀՀԿ-ի մասին: Դուք նույնպես անում եք այն, ինչ անում եք: Պարզապես մեր և ձեր արածը տրամագծորեն հակառակ բաներ են այսօր, ինչը նշանակում է, որ վաղն ամեն մեկս մեր արածի համար ենք ստիպված լինելու պատասխան տալ առանձին-առանձին: Եվ ապա, պարոն Ֆարմանյան, ինչո՞ւ եք կարծում, որ խորհրդարան չանցած ՀՅԴ-ին ու ՀՀԿ-ին Նիկոլն այդքան անհամաչափ է պատժելու՝ ՀՅԴ-ն արգելելու է, իսկ ՀՀԿ-ին «թեթևի մեջ» է նեղացնելու: Ի՞նչ է, դուք ավելի ընդունելի եք Նիկոլի համար, քան մե՞նք: Թե բա՝ Նիկոլը ՀՅԴ-ն փակելով՝ շքեղ նվեր է անելու իր արտաքին տերերին: Ովքե՞ր են այդ արտաքին տերերը, դուք ճանաչո՞ւմ եք նրանց, պատահաբար դրանք այն հզոր ուժերը չե՞ն, որ Նիկոլին բերեցին իշխանության: Հետևաբար ուզում եմ հասկանալ, պարոն Ֆարմանյան, ինչո՞ւ եք անգործ նստել և չեք ուզում օգնել ՀՅԴ-ին՝ կանգնելով նրա կողքին՝ այդ ուժերի և նրանց բերածոյի դեմ պայքարում: Չլինի՞ Ռոբերտ Քոչարյանն է ձեզ խանգարում:

Հ.Գ. Պարոն Ֆարմանյան, ՀՅԴ-ին մի սովորեցրեք ինչպես պայքարել: Դա նույնն է, թե «քեռուն» սովորեցնեք ինչպես «դոմփել»: Հավատացնում եմ ձեզ, անշնորհակալ գործ եք անում: