Մարտի 24-ը՝ դեպրեսիայի դեմ պայքարի միջազգային օր

Tue, 24 Mar 2026 20:15:19 +0400

Այսoր դեպրեսիայի դեմ պայքարի միջազգային օրն է , որի նպատակը հոգեկան առողջության խնդիրների նկատմամբ հանրային ուշադրությունը մեծացնելն է։

Դեպրեսիան հոգեկան առողջության ամենատարածված խանգարումներից է։ Այն արտահայտվում է կյանքի նկատմամբ հետաքրքրության կորստով, տևական ընկճված տրամադրությամբ, ինքնագնահատականի անկմամբ, մեղքի զգացումով և ներքին ճնշվածությամբ։ Մասնագետները նշում են, որ սա լուրջ վիճակ է, որը հաճախ պահանջում է մասնագիտական օգնություն և բուժում։ Պատմականորեն այս երևույթը հայտնի է եղել նաև «մելանխոլիա» անվամբ։

Դեպրեսիան կարող է ունենալ տարբեր աստիճաններ՝ թեթև, միջին և ծանր։ Ծանր փուլում այն կարող է լրջորեն խաթարել մարդու առօրյան՝ ազդելով աշխատունակության, քնի, ախորժակի և ընդհանուր հոգեվիճակի վրա։ Որոշ դեպքերում այն կարող է ուղեկցվել նաև ինքնասպանության մտքերով, ինչն առավել ընդգծում է ժամանակին աջակցության և բուժման կարևորությունը։ ԱՀԿ-ն նշում է, որ դեպրեսիան արդյունավետորեն բուժելի է՝ թե՛ թեթև, թե՛ միջին, և թե՛ ծանր ձևերի դեպքում։

Առողջապահության համաշխարհային կազմակերպության տվյալներով՝ դեպրեսիան հատկապես տարածված է մեծահասակների շրջանում և կանանց մոտ ավելի հաճախ է հանդիպում, քան տղամարդկանց։ Միևնույն ժամանակ, ծննդաբերությունից հետո կանանց մի մասի մոտ ևս կարող են արձանագրվել դեպրեսիվ խանգարումներ։ ԱՀԿ-ի տվյալներով՝ ամբողջ աշխարհում ծննդաբերած կանանց շուրջ 13 տոկոսը բախվում է հոգեկան խանգարումների, հիմնականում՝ դեպրեսիայի նշանների։