«Աշխարհը մտել է վտանգավոր նոր փուլ»
Fri, 03 Apr 2026 14:08:57 +0400
Իրանագետ Վարդան Ոսկանյանը անդրադարձել է աշխարհում տեղի ունեցող իրադարձություններին ՝ գնահատելով, որ վերջին զարգացումները վկայում են գլոբալ անվտանգության համակարգի խորքային փոփոխության մասին։
Նրա դիտարկմամբ՝ Իրանի դեմ ընթացող պատերազմական գործողությունները ցույց են տալիս, որ միջազգային իրավունքի մեխանիզմները փաստացի այլևս չեն գործում։ Ոսկանյանը նշում է, որ հատկապես քաղաքացիական ենթակառուցվածքների՝ կրթական, բժշկական և դեղագործական հաստատությունների դեմ հարձակումները նոր և մտահոգիչ երևույթ են, որոնք վկայում են ուժի գերակայության մասին միջազգային հարաբերություններում։
Իրանագետի կարծիքով՝ նման գործողությունները խոսում են այն մասին, որ աշխարհը մտել է վտանգավոր նոր փուլ, որտեղ պետությունները կարող են դիմել ծայրահեղ միջոցների՝ առանց լուրջ միջազգային արձագանքի։ Նա ընդգծում է, որ եթե նման գործողությունները իրականացվեն առանձին անձանց կողմից, դրանք միանշանակ կդասվեն որպես ահաբեկչություն, սակայն պետական մակարդակով նույն քայլերը հաճախ չեն արժանանում համարժեք դատապարտման։
Ոսկանյանը նաև ուշադրություն է հրավիրում այն հանգամանքի վրա, որ այս զարգացումները հատկապես վտանգավոր են սահմանափակ պաշտպանական հնարավորություններ ունեցող երկրների համար։ Նրա գնահատմամբ՝ նման պայմաններում ավելի ու ավելի շատ պետություններ կարող են սկսել մտածել սեփական անվտանգության ապահովման այլընտրանքային միջոցների մասին, այդ թվում՝ ռազմական ներուժի ուժեղացման և նույնիսկ միջուկային զենքի ստեղծման ուղղությամբ։
Իրանագետը եզրափակում է, որ ձևավորվող այս իրողությունները կարող են էապես փոխել միջազգային հարաբերությունների տրամաբանությունը և ստեղծել նոր մարտահրավերներ փոքր ու միջին պետությունների համար։