Լիբանան-Իսրայել բանակցություններ՝ Վաշինգտոնում․ 1990-ականներից ի վեր՝ առաջին անգամ
Tue, 14 Apr 2026 11:00:25 +0400
ԱՄՆ պետքարտուղար Մարկո Ռուբիոն կմասնակցի Միացյալ նահանգների միջնորդությամբ Իսրայելի և Լիբանանի միջև բանակցություններին, որոնց մեկնարկը նախատեսված է այսօր՝ ապրիլի 14-ին, Վաշինգտոնում։
Այս մասին հաղորդում է Axios-ը՝ հղում անելով Պետդեպի խոսնակին։
Հրապարակման համաձայն՝ Վաշինգտոնը հույս ունի, որ ուղիղ երկխոսությունը կօգնի նվազեցնել լարվածությունը Լիբանանում Իսրայելի և «Հզբոլլահ»-ի միջև ընթացող մարտերի ֆոնին։ Հրատարակությունը նշում է, որ երկու կողմերի միջև նման ուղիղ շփումներ տեղի չեն ունեցել 1990-ական թվականներից ի վեր։
Axios-ի համաձայն՝ բանակցությունների օրակարգում երեք հիմնական հարց է՝ հրադադար և ռազմական գործողությունների թուլացում, «Հզբոլլահ»-ի երկարաժամկետ զինաթափում, ինչպես նաև Իսրայելի ու Լիբանանի միջև ավելի լայն խաղաղության համաձայնագրի հեռանկարներ։
Հրապարակման համաձայն՝ հանդիպմանը, ինչպես սպասվում է, կմասնակցեն Լիբանանում ԱՄՆ դեսպան Միշել Իսան, Պետդեպարտամենտի խորհրդական Մայքլ Նիդհեմը, ԱՄՆ-ում Իսրայելի դեսպան Եչիել Լեյթերը և ԱՄՆ-ում Լիբանանի դեսպան Նադա Համադե Մոավադը։
Միաժամանակ, «Հզբոլլահի» առաջնորդ Նաիմ Քասեմը հայտարարել է, որ դեմ է Իսրայելի հետ բանակցություններին՝ դրանք համարելով «անօգուտ»։
Axios-ը նաև ընդգծում է Դոնալդ Թրամփի դերը։ Աղբյուրների համաձայն՝ հենց ԱՄՆ նախագահի ճնշումն էր, որ Իսրայելի վարչապետ Բենիամին Նեթանյահուին ստիպեց համաձայնել ուղիղ բանակցություններ սկսել՝ կապված Իրանի հետ ընթացող բանակցություններին չխոչընդոտելու հետ։