Տխրահռչակ Ռուբինյան Ռուբենն ընդդիմության պլաններն, իր կարծիքով, ձախողող մի դատողություն է արտաբերել: Նրա ասելով, Ռուսաստանում կաշառք ստացած հայաստանցիները, ովքեր վերադառնալու են ԱԺ ընտրությանը մասնակցելու նպատակով, ձերբակալվելու են հենց օդանավակայանում:

Երևի այդ նպատակով էին օդանավակայանի ռուս սահմանապահները փոխարինվել հայաստանցիներով: Չի մոռացել նաև հերթական անգամ հիշատակել Վեհափառի եղբոր՝ Եզրաս արքեպիսկոպոսի անունը՝ կրկին ներկայացնելով նրան որպես ԿաԳեԲե-ի գործակալ:

Ռուբենն այդպես էլ չհասկացավ, որ այդ կազմակերպությունը վաղուց գոյություն չունի՝ ճիշտ այնպես, ինչպես այն պետությունը, որտեղ ստեղծվել էր այն: Ինչևէ, ըստ Ռուբենի, վերադարձողների մեջ լինելու են նաև արքեպիսկոպոսի «ցանցից» կաշառք ստացածներ:

Բայց պարզ չէ, թե ովքեր են սահմանապահներին հայտնելու, որ ինքնաթիռի ուղևորներից Պողոսներն, օրինակ, կաշառք են ստացել, իսկ Պետրոսն ու Մարտիրոսը՝ ոչ: Պարզ չէ նաև, թե ինչպես է հայաստանյան ԱԱԾ-ն ձեռք բերելու այդ տվյալները: Այն էլ այնպիսի երկրում, ինչպիսին Ռուսաստանն է: Որովհետև եթե լիներ Եվրամիության որևէ երկիր, ապա այդ առումով կարող էին հարցեր չառաջանալ: Ռուբենն, իհարկե, գիտակցում է, որ իր ասածը բլեֆ է: Բայց դե մարդուն հանձնարարել են, որ նման անհեթեթություն արտաբերի, ու նա դա կատարում է: Ժամանակին մամուլում գրվել էր, որ նա պաշտոնական առաջխաղացման է ձգտում՝ ԱԺ փոխխոսնակից ուզում է վերածվել խոսնակի: Ու հանուն դրա, բնականաբար, շատ ավելի անհեթեթ բաներ կարող է բարձրաձայնել:

Քանի որ դա իմանալ հնարավոր չէ՝ մնում է, որ հունիսի սկզբին ՌԴ-ից ինքնաթիռով Հայաստան վերադարձող արական սեռի բոլոր ուղևորներին դրա անվան տակ ձերբակալեն: Կարող եմ, նույնիսկ, ենթադրել, որ նման փորձ կարող է կատարվել: Ու «բարեսիրտ» Ռուբենն էլ շտապում է մարդկանց զգուշացնել, որպեսզի նրանք վախենան ու հնարավորինս քիչ մարդ գա ՌԴ-ից ԱԺ ընտրությանը մասնակցելու նպատակով: Զգուշացումն էլ, իրենց խելքով, կփոխանցեն այստեղ բնակվող հարազատները` առաջարկելով, որ իրենց հարազատները չժամանեն հունիսի 7-ին ընդառաջ:

Ի դեպ, իրավագիտության դոկտոր, պրոֆեսոր, Մայր Աթոռի Գերագույն հոգևոր խորհրդի անդամ Գևորգ Դանիելյանն, ինչպես «Հրապարակ»-ն է գրել, հորդորում է չքննարկել, չանդրադառնալ իշխանության կողմից դաշտ նետվող կեղծ օրակարգերին, այդ թվում՝ Ռուբինյանի վերջին հայտարարությանը։ Հարգելով հանդերձ պարոն Դանիելյանին՝ ասեմ, որ այս հարցում նրա հետ համաձայն չեմ: Մարդկանց մեծամասնությունը տեղեկատվություն ստանալու նպատակով ոչ թե թերթ է կարդում կամ լրատվական կայքեր աչքի անցկացնում՝ այն էլ ընդդիմադիր, այլ հանրային հեռուստատեսություն է դիտում: Կարծում եմ, որ այդ անհեթեթությունն անընդհատ կշրջանառվի հանրայինով: Ու մարդիկ իսկապես կարող են առաջնորդվել շառից ու փորձանքից հեռու լինելու մտայնությամբ:

Այնպես որ այս մասին պետք է գրել ու խոսել, որպեսզի մարդիկ իմանան, որ դա պարզ բլեֆ է, հաշվակրը վախեցնելն է, ոչ թե ձերբակալելը: Կարծում եմ, որ դա նույնիսկ եվրոպական չժողովրդավարության տեսակետից խայտառակություն կլինի եւ անգամ մեր գործադիրի կցորդ իրավապահները չեն գնա դրան:

Ի դեպ, ընտրությունների լայնածավալ ընտրախախտումների մոլդովական փորձում, որը եվրոպացիները փորձում են ներդնել այստեղ, նման մի փորձ արվել էր` ՌԴ-ում բնակվող հարյուրհազարավոր մոլդովացիների համար ընդամենը երկու տեղամաս էին բացել Ռուսաստանում, իսկ եվրոպական քաղաքաներում բացել էին տասնապատիկ ավելի ընտրատեղամասեր, եւ այնտեղ բնակվող մոլդովացի միգրանտ ընտրողների շնորհիվ էլ ընտրվեց Մայա Սանդուն:

Մոլդովական փորձում առկա էր նաև քվեաթերթիկների լցոնման հանգամանքը:

Ընդունելով, որ Նիկոլն ամեն ինչ անելու է պաշտոնին մնալու համար, ենթադրում եմ, որ այս քեյսը (դեպքը, գործը) ևս կյանքի կոչվելու հավանականություն ունի: Ու ընդդիմությունն էլ չպետք է այն աչքաթող անի: