Սա վնասում է ժողովրդավարության ընկալմանն ամբողջ աշխարհում
Mon, 04 May 2026 11:25:29 +0400
Երևանում՝ մարզահամերգային համալիրի դիմաց անցկացվող բողոքի ակցիայի ընթացքում, որը կազմակերպվել է Եվրոպական քաղաքական համայնքի 8-րդ գագաթնաժողովի շրջանակում, արցախից բռնագաղթած Նարե Սիմոնյանը հանդես է եկել կոշտ քննադատությամբ՝ ուղղված Հայաստանի գործող իշխանություններին։
Նա նշել է, որ եվրոպական երկրների առաջնորդները պետք է հստակ դիրքորոշում արտահայտեն և արձանագրեն, որ ներկայիս իշխանությունների քաղաքականությունը, իր գնահատմամբ, վնասում է ժողովրդավարությանը Հայաստանում։ Սիմոնյանի համոզմամբ՝ նման իշխանություններին աջակցելը բացասաբար է անդրադառնում նաև ժողովրդավարության ընկալման վրա ամբողջ աշխարհում։
Անդրադառնալով խոսքի ազատության թեմային՝ նա ընդգծել է, որ ժողովրդավարության հիմքում հենց ազատ խոսքն է, սակայն, իր խոսքով, իշխանությունները շարունակաբար սահմանափակում են այն։ Սիմոնյանը պնդել է, որ երկրում կան բազմաթիվ քաղբանտարկյալներ, որոնց թվում՝ հոգևորականներ և լրագրողներ։
Նրա գնահատմամբ՝ իշխանությունները պարբերաբար նախաձեռնում են օրենքներ, որոնք սահմանափակում են քաղաքացիների իրավունքները։ Միևնույն ժամանակ, նա ընդգծել է, որ, իր կարծիքով, պետությունը չի ապահովում արցախցիների իրավունքների պաշտպանությունը, այլ նաև խոչընդոտում է դրանց իրացմանը։
Սիմոնյանը նաև նշել է, որ Հայաստանի իշխանությունները բավարար քայլեր չեն ձեռնարկում Արցախի մշակութային ժառանգությունը միջազգային մակարդակում պաշտպանելու ուղղությամբ։ Նրա խոսքով՝ իշխանությունների հռետորաբանությունը որոշ դեպքերում նպաստում է արցախցիների նկատմամբ բացասական վերաբերմունքի ձևավորմանը, ինչը խորացնում է հասարակության ներսում առկա բաժանումները։