Մեկնարկել են «Սթենլի Էթվելի վերադարձը» նոր թրիլլերի նկարահանումները, ըստ Սթիվեն Սոդեբերգի գործի։ Այն կարելի է դասել գոթիկական դրամայի ժանրին, որն ունի հոգեբանական թրիլլերի էլեմենտներ։ Ներկայացնում է հարուստ ընտանիքի ժառանգի պատմությունը, որը տեւական բացակայությունից հետո վերադառնում է տոհմական կալվածք եւ բախվում անցյալի գաղտնիքներին, ընտանեկան կոնֆլիկտներին եւ ներքին անձնական ճգնաժամերի։ Սյուժեն կառուցված է գլխավոր հերոսի՝ Սթենլի Էթվելի եւ տոհմական կալվածքի շուրջ, որը կոնկրետ հերոսի համար հանդիսանում է վերադարձի հիմնական մոտիվ։ Այս «վերադարձի» մոտիվը, ըստ էության, եվրոպական գրականության համար դասական է եւ խորհրդանշում է ոչ միայն ֆիզիկական վերադարձ, այլ նաեւ՝ անցյալի։

Արծարծված հիմնական թեմաներն են՝ հիշողություն եւ ժառանգություն, ինքնություն եւ ես-ի որոնումներ, վերնախավի բարոյական անկում եւ բարոյալքում, ընտանեկան եւ անցյալի գաղտնիքներ ու ամոթի զգացողություն։ Գլխավոր հերոսը տիպիկ երկատված անձ է, որը գտնվում է ժամանակակից աշխարհի ռացիոնալականության եւ անցյալի իռացիոնալականության սահմանագծին։ Նրա վերադարձը նաեւ դառնում է հերոսի հոգեբանական վերափոխման ցուցիչը։ Ուշագրավ է այն, որ առանձին պերսոնաժ է ներկայացված ընտանեկան կամ տոհմիկ կալվածքը։ Կրում է Սոդերբերգի յուրահատուկ ձեռագիրը եւ մեկնաբանվում է նաեւ այդ ձեռագրի համատեքստում, երբ պատումը ոչ գծային է, ունի ֆրագմենտալ կառուցվածք, մեծ ուշադրություն է դարձված վիզուալ դետալներին, այսինքն՝ հեղինակն ունի կինեմատոգրաֆիական մտածողություն եւ շարադրում է դրա համեմատ։ Ֆիլմի ռեժիսորը Բրայան Վելշն է։ Նկարահանումներին մասնակցում են Նիկոլաս Գալիցինը, Դեմիեն Լյուիսը։