Բախումներ՝ գլխավոր ընդդիմադիր ուժի ներկայացուցիչների միջև
Sun, 24 May 2026 17:00:05 +0400
Անկարայի դատարանի կողմից ընդդիմադիր Հանրապետական ժողովրդական կուսակցության (ԺՀԿ) 38-րդ համագումարի արդյունքները չեղյալ հայտարարելուց հետո, կիրակի օրը Անկարայում կուսակցության գլխավոր գրասենյակի դիմաց լարվածություն է առաջացել կուսակցության նոր ղեկավար Քեմալ Քըլըչդարօղլուի և ընդդիմադիր գլխավոր ուժի հեռացված նախագահի՝ Օզգյուր Օզելի կողմնակիցների միջև։
Ոստիկանությունը և Քըլըչդարօղլուի կողմնակիցների բազմությունը հավաքվել են Թուրքիայի մայրաքաղաքում կուսակցության գլխավոր գրասենյակի դարպասների մոտ։ Երբ Քըլըչդարօղլուի ներկայացուցիչները փորձել են մտնել շենք, բախում է սկսվել պաշտոնանկ արված կուսակցության ղեկավար Օզելի կողմնակիցների հետ։ Երկու ճամբարները սկսել են ջրի շշեր նետել և միմյանց հրել։
ԺՀԿ ղեկավարությունը, ըստ տեղեկությունների, մնացել է գլխավոր գրասենյակի ներսում։
Անկարայի նահանգապետարանը հայտարարել է, որ ոստիկանությանը հանձնարարվել է կատարել դատարանի որոշումը և նպաստել կուսակցության նախագահ Քեմալ Քըլըչդարօղլուի կենտրոնական գրասենյակում տեղակայմանը։ Քըլըչդարօղլուի խոսնակ Աթաքան Սյոնմեզը հայտարարել է, որ քաղաքական գործիչը խիստ մտահոգված է շարունակվող լարվածությամբ և ցանկանում է, որ գործընթացը լուծվի խաղաղ ճանապարհով։
Ավելի վաղ թուրքական դատարանը չեղյալ էր հայտարարել CHP-ի 2023 թ․ համագումարի արդյունքները՝ այդպիսով անվավեր ճանաչելով Օզգյուր Օզելի ընտրությունը որպես կուսակցության նախագահ: Դրա փոխարեն դատարանը վերականգնել է կուսակցության նախկին առաջնորդ Քեմալ Քըլըչդարօղլուի պաշտոնը:
Ուրբաթ օրը Անկարայի դատարանը մերժել է Թուրքիայի գլխավոր ընդդիմադիր կուսակցության՝ CHP-ի բողոքարկումը՝ իր առաջնորդ Օզգյուր Օզելին պաշտոնից հեռացնելու որոշման դեմ: