Ռուս-ուկրաինական բանակցությունների հարթակ են ստեղծում
Thu, 04 Jun 2026 18:00:33 +0400
Գերմանիան, Ֆրանսիան եւ Մեծ Բրիտանիան մշակում են նախագիծ՝ Ռուսաստանի եւ Ուկրաինայի միջեւ բանակցային հարթակ ստեղծելու վերաբերյալ։ Այս մասին գրում է Bloomberg պարբերականը։
Վերոնշյալ երեք երկրների դիվանագետները, համաձայն հոդվածի, ներկայումս անցկացնում են ակտիվ քննարկումներ մեկմեկու, ինչպես նաեւ Կիեւի հետ, թե ինչպես կարելի է Մոսկվային դրդել սկսել երկխոսություն։
Պարբերականի աղբյուրները նշում են, որ այն բանից հետո, երբ Միացյալ Նահանգները փաստացի հեռու է քաշվել միջնորդի իր ստանձնած դերակատարությունից, եվրոպական երկրները որոշել են այդ ընդմիջումից օգտվել եւ փորձել Վլադիմիր Պուտինին ներգրավել պատերազմի դադարեցման պայմանների քննարկման պրոցեսի մեջ։
Վերջնական խոսքը, սակայն Ուկրաինայի նախագահ Վլադիմիր Զելենսկունն է։ Եվրոպացիները չեն պատրաստվում պարտադրել Կիեւին ռազմավարություն, որը վերջինս պատրաստ չէ ընդունել։
Շատ վերլուծաբաններ արդեն հայտարարել են, որ դա անարդյունք եւ դեռ չսկսված՝ տապալված ձեռնարկ է, քանի որ մարտի դաշտում հաջողություններ ունեցող Ռուսաստանը չի երկխոսի այնպիսի հարթակում, որտեղ վերջին խոսքի իրավունքը Կիեւին է վերապահված։
Որոշ եվրոպացի պաշտոնյաներ էլ կարծում են, որ բանակցային հարթակ ստեղծելու ջանքերի փոխարեն Կիեւին պետք է որքան հնարավոր է շատ զենք տալ եւ ինչքան հնարավոր է՝ խստացնել Ռուսաստանի դեմ սանկցիաները։
Բացի այդ, եվրոպացի դիվանագետները չեն մոռանում նաեւ նշել, որ Եվրոպայի ցանկացած քայլ այդ ուղղությամբ պետք է համաձայնեցնել Վաշինգտոնի հետ։