Եթե օրենքով առաջնորդվեին առաջին հերթին ՔՊ-ին պետք արգելեին մասնակցել

Fri, 05 Jun 2026 20:20:09 +0400

«Հրապարակի» զրուցակիցը քաղաքագետ Արմեն Բաղդասարյանն է:

– Արամ Զավենի Սարգսյանը որոշել է վերջնականապես խայտառակել իրեն` լինելով ինքնուրույն, իբրև թե ընդդիմադիր ուժի առաջնորդ, նա Նիկոլ Փաշինյանի հրամանով դիմում է ներկայացնում ԿԸՀ, որպեսզի «Ուժեղ Հայաստան» կուսակցության մասնակցությունն ընտրություններին արգելվի: Ի՞նչ նախադեպ է սա, ինչո՞ւ իշխանությունը որոշեց կրկնել Մոլդովայի սցենարը: Ի՞նչ եք կարծում` ՔՊ-ական Վահագն Հովակիմյանը կհակառակվի՞ իր շեֆին:

– Ես չեմ բացառում, որ սա նախընտրական շոու է, թե իբրև Նիկոլ Փաշինյանի հրահանգով ուժերից մեկը դիմեց ԿԸՀ, որպեսզի դադարեցվի «Ուժեղ Հայաստան» կուսակցության մասնակցությունը ընտրություններին, սակայն ԿԸՀ-ն այնքան անկախ կառույց է, որ համարձակվեց ընդդիմանալ ու մերժել այդ հայցը: Գուցե նաև սա իսկապես ամիսներ առաջ ծրագրված շոու էր, ինչպես որ տեղի ունեցավ Մոլդովայում: Այնտեղ էլ ընտրություններից 24 ժամ առաջ հիմնական ընդդիմադիր ուժին արգելեցին մասնակցել ընտրություններին: Ես կդժվարանամ հստակ ասել, թե Հայաստանում որ սցենարի մասին է խոսքը, սակայն «Հանրապետություն» կուսակցության առաջնորդը բարոյավարքաբանական մեծ խնդիրներ ունի, այս քայլը շատ անպատվաբեր էր, սակայն դա Արամ Սարգսյանի որոշելիքն է: Անկախ այն բանից, թե ինչպիսի զարգացումներ կլինեն, Արամ Սարգսյանի կուսակիցները կարմրելու նոր առիթ ունեցան, քանի որ իրենց արածը մեղմ ասած ազնիվ չէր:

– Ըստ Ձեզ, եթե նման քայլի գնա ԿԸՀ-ն, ինչը հեռու չէ Վահագն Հովակիմյանից, ընդդիմադիր ընտրողը ի՞նչ պետք է անի, մյուս ընդդիմադիր ուժերի օգտի՞ն քվեարկի` Քոչարյան, Թաթոյան և այլն:

– Նիկոլ Փաշինյանի հաշվարկները հիմնված են այն բանի վրա, որ Սամվել Կարապետյանի ընտրազանգվածը ոչ միայն ընդդիմադիր է, այլև մոտիվացված է: Ռեալ հույս կա, որ Կարապետյանը կարող է լինել հաջորդ վարչապետը: Եթե մոտիվացիան նվազի, ապա մի մասը անպայման կգնա այլ ընդդիմադիր ուժի քվեարկելու, սակայն մի մասը` չի գնա ու չի քվեարկի: Կարծում եմ` կա նման հաշվարկ: Եթե ԿԸՀ-ն իրապես օրենքներով առաջնորդվեր, ապա 18 ուժից կեսից ավելին ընտրություններին չէր կարողանա մասնակցել, առաջին հերթին «Քաղաքացիական պայմանագիրը», որը այս ընթացքում ամենաշատ խախտումներն է թույլ տվել:

– Երեկվա բանավեճից էլ ակնհայտ դարձավ, որ Փաշինյանը շատ անհանգիստ է: Ինչո՞ւ:

– Խնդիրը քարոզարշավն էր, և Սամվել Կարապետյանի տպավորիչ հանրահավաքը: Սոցիոլոգիական հարցումները ՔՊ-ի վտանգների մասին են ահազանգում, թեպետ Փաշինյանը առաջատարն է, սակայն ընդդիմադիրները միասին ունեն ավելի շատ ձայներ: Նիկոլ Փաշինյանը գիտակցում է, որ հանրության մեծ մասը նեգատիվ է տրամադրված իր հանդեպ, այդ պատճառով էլ գուցե որոշել են գնալ այս սցենարով: Այսօրվա ձերբակալություններն էլ կարող են լինել կոմպրոմատ` խորհրդարան անցնող ուժերի համար, որպեսզի իրենց խելոք պահեն: