Ավերիչ երկրաշարժի զոհերի թիվն աճում է, անհետ կորածներ կան
Tue, 09 Jun 2026 16:30:26 +0400
Ֆիլիպիններում տեղի ունեցած հզոր երկրաշարժի հետևանքով զոհերի թիվը հասել է 37-ի: Եվս 487 մարդ վիրավորվել է, իսկ չորսը անհետ կորած են համարվում: Bloomberg-ը հաղորդում է, որ փրկարարական աշխատանքները և վնասի գնահատումը շարունակվում են։
Քաղաքացիական պաշտպանության նախարարի օգնական Բեռնարդո Ռաֆայելիտո Ալեխանդրոյի խոսքով՝ զոհերի թիվը կարող է աճել, քանի որ որոնողական-փրկարարական աշխատանքները դեռևս շարունակվում են։
Նախնական տվյալներով՝ վնասվել է մոտ 2000 տուն, որոնցից ավելի քան 400-ը լիովին ավերվել են: Վնասվել են նաև 117 կառավարական գրասենյակներ և մոտ 20 կամուրջներ:
Հունիսի 8-ի առավոտյան Մինդանաո կղզում տեղի է ունեցել 7.8 մագնիտուդով երկրաշարժ: ԱՄՆ երկրաբանական ծառայության տվյալներով՝ սա Ֆիլիպիններում 1976 թվականից ի վեր տեղի ունեցած ամենաուժեղ երկրաշարժն է։