Ծախսերը կազմել են 22.5 միլիարդ

Wed, 10 Jun 2026 12:40:00 +0400

Վարչապետի աշխատակազմի ղեկավար Արայիկ Հարությունյանը Ազգային ժողովում՝ 2025 թվականի պետական բյուջեի քննարկման ժամանակ հայտնել է, որ կառավարության ծրագրով նախատեսված 27 միջոցառումներից արդեն իրականացվել է 25-ը։

Նրա խոսքով՝ հաշվետու ժամանակահատվածում աշխատակազմի ծախսերը կազմել են 22.5 մլրդ դրամ, ինչը կազմում է նախատեսված ցուցանիշի շուրջ 96 տոկոսը։ Հարությունյանը նշել է, որ այս արդյունքը մոտ է նախորդ տարվա մակարդակին։

Նա ընդգծել է, որ թերակատարումները կազմել են մոտ 4 տոկոս, սակայն 2024 թվականի համեմատ ծախսերի ընդհանուր ծավալը ավելացել է մոտ 906 մլն դրամով։

Աշխատակազմի ղեկավարը նաև հայտնել է, որ հանրային իրազեկման համար նախատեսված միջոցները ամբողջությամբ՝ 100 տոկոսով, օգտագործվել են և կազմել են 728 մլն դրամ։

Հարությունյանի տեղեկացմամբ՝ 2025 թվականին «ՀՀ վարչապետի լիազորությունների իրականացման ապահովում» ծրագրի շրջանակում ծախսերը կազմել են 7.2 մլրդ դրամ, ինչը նախորդ տարվա համեմատ աճել է շուրջ 9 տոկոսով։

Նա նաև նշել է, որ կառավարական առանձնատների պահպանման և սպասարկման համար նախատեսված միջոցները նույնպես ամբողջությամբ՝ 100 տոկոսով, կատարվել են։