Հանրությունը պատրաստ է տեր կանգնել երկրին և մերժում է պարտադրված կապիտուլյացիան․ Գևորգ Գևորգյան

Wed, 17 Jun 2026 20:40:29 +0400

ԿԸՀ-ի դիմաց վերջին հավաքները փաստեցին՝ հանրությունը պատրաստ է տեր կանգնել երկրին և մերժում է պարտադրված կապիտուլյացիան։ Ընդդիմադիր գործընկերների կողմից մշակվող քայլերը կարևոր են, բայց որպեսզի այս հանրային էներգիան նորից չմաշվի լոկ հանրահավաքային հռետորաբանության ու անցյալի ձախողված սցենարների կրկնության մեջ, մեզ պետք է անցում կատարել որակապես նոր, կազմակերպված մակարդակի։

Իրադարձությունները զարգանում են չափազանց արագ, որտեղ արտաքին քաղաքական գործոններն անմիջականորեն թելադրում և ձևավորում են ներքաղաքական օրակարգը, ու ժամանակի կորուստն այս փուլում հավասարազոր է պարտության։ Մարդիկ հոգնել են անորոշությունից ու սպասում են հստակ, հասցեական անելիքների։

Այսօր իրավունք չկա նորից պառակտվելու, սեփական ամբիցիաներով առաջնորդվելու, մեղավորներ թիրախավորելու և այդպես ավելի փոշիանալու։ Իշխանության անխոչընդոտ ընթացքն ու երկրի թրքացումը կանգնեցնելու միակ ձևը ընդդիմադիր ողջ պոտենցիալը մեկտեղելն է։

Առաջարկում ենք փոխել գործելաոճը. հուզական հավաքներից անցնել կառուցողական, հստակ թիրախային գործողությունների։ Մեզ պետք է ոչ թե մանդատների կռիվ, աթոռի պայքար, կամ նոր, իբր «փրկիչներ», այլ ձևավորել մեկ միասնական, համակարգող օպերատիվ հարթակ, որտեղ քաղաքական ուժերը, քաղաքական անհատներն ու բոլոր փորձագետները միասին կմշակեն գործողությունների հստակ ճանապարհային քարտեզ։ Մենք պետք է ստեղծենք իրական իրավական ու քաղաքացիական պատնեշ՝ թույլ չտալու համար սահմանադրական փոփոխություններն ու պետականության վերջնական կորուստը։

Այս առաջարկին միս ու արյուն տալու և ամենօրյա աշխատանքին լծվելու բացարձակ պատրաստակամություն կա պայքարի բոլոր ընկերների մոտ։

Հաջորդող քայլերը պետք է լինեն բաց և թափանցիկ։

Ով պատրաստ է իրական, կազմակերպված աշխատանքի՝ ուրեմն միասին, մինչև վերջ

Գրել է Գևորգ Գևորգյանը