Նոր վարույթ դատավորի նկատմամբ
Wed, 24 Jun 2026 17:29:39 +0400
Ընդդիմադիրներին կալանավորելու, աղմկոտ քաղաքական գործերով հայտնի Երևանի ընդհանուր իրավասության քրեական դատարանի դատավոր Կարեն Ֆարխոյանի նկատմամբ կարգապահական վարույթ է հարուցվել։ ՀՀ արդարադատության նախարարությունն արդեն միջնորդությունը ներկայացրել է ԲԴԽ՝ պահանջելով կարգապահական պատասխանատվության ենթարկել Ֆարխոյանին։ «Հրապարակ»-ի տեղեկություններով՝ նախարարությունը Ֆարխոյանի դեմ վարույթ է հարուցել դատական ակտը ուշ կայացնելու համար (խոսքը 1 տարի ուշացնելու մասին է)։ Նշենք, որ նախարարության կողմից դատավորների դեմ ԲԴԽ տարած գործերի մեծ մասը վերաբերում է դատական ակտերն ուշ կայացնելուն կամ ուշ տրամադրելուն։
Նշենք նաեւ, որ Ֆարխոյանն այժմ քննում է Բագրատ սրբազանի եւ մյուսների գործը, նա տեւական ժամանակ բանտային կալանքի պայմաններում էր պահում բարձրաստիճան հոգեւորականին, եւ միայն վերջերս փոխվեց սրբազանի խափանման միջոցը տնային կալանքով՝ վերաքննիչ դատարանի որոշմամբ։