Հայաստանի վարչապետ Նիկոլ Փաշինյանը Եվրասիական տնտեսական միությանը (ԵԱՏՄ) երկրի անդամակցության թեմայի շուրջ խոսակցությունը տեղափոխում է դեմագոգիայի հարթություն, ինչպես նա դա արդեն արել էր Հավաքական անվտանգության պայմանագրի կազմակերպությունում (ՀԱՊԿ) Երևանի մասնակցությունը սառեցնելու կապակցությամբ։ Այս մասին ասված է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ, հաղորդում է ՏԱՍՍ-ը:

«Ծանոթացանք հունիսի 25-ին Հայաստանի կառավարության նիստում, ինչպես նաև դրա արդյունքներով լրագրողների հետ շփման ընթացքում վարչապետ Նիկոլ Փաշինյանի արած հայտարարություններին։ Ակնհայտ է, որ հայ վարչապետը խոսակցությունը շեղում է, տեղափոխում դեմագոգիայի հարթություն, ինչպես նա դա արդեն արել էր ՀԱՊԿ-ում Երևանի մասնակցությունը, այսպես կոչված, սառեցնելու կապակցությամբ»,- ուշադրություն է հրավիրել դիվանագետը։

Զախարովան նշել է, որ Հայաստանի ներկայիս իշխանությունների, մասնավորապես՝ հանրապետության վարչապետ Նիկոլ Փաշինյանի պահվածքը չի կարելի անվանել բարեխիղճ անդամակցություն ԵԱՏՄ-ին։

Դիվանագետը նշել է, որ Փաշինյանը հունիսի 25-ի կառավարության նիստում, ինչպես նաև լրագրողների հետ շփման ընթացքում անպատասխան է թողել գլխավոր հարցը։

«Մասնավորապես այն մասին, թե ինչպես կարելի է 2025 թվականին ընդունել «Հայաստանի Հանրապետության Եվրոպական միությանը անդամակցելու գործընթացը սկսելու մասին» օրենքը, անընդհատ պնդել, որ Հայաստանի ապագան Եվրոպայում է, 2026 թվականի մայիսին ստորագրել ԵՄ-ի հետ համատեղ հռչակագրեր՝ հանրապետությանը այդ միավորմանը մերձեցնելուն ուղղված կոնկրետ քայլերի ցանկով, և միաժամանակ խոսել ԵԱՏՄ լիիրավ անդամ մնալու մտադրության մասին։

Ըստ էության, ստացվում է, որ Երևանի գործունեությունը միության շրջանակներում ընդամենը ժամանակավոր միջոց է՝ եվրոպական բլոկին միանալու համար հող նախապատրաստելու նպատակով, որի չափանիշներն ու կանոնները արմատապես տարբերվում են ԵԱՏՄ-ից, և որը, բացի այդ, Ռուսաստանի հանդեպ թշնամական քաղաքականություն է վարում։ Նման պահվածքը չի կարելի անվանել բարեխիղճ անդամակցություն ԵԱՏՄ-ին»,- ընդգծել է Զախարովան։