Կարգադրել է հետաքննել, թե ինչու բենզինի բարձր գները պահպանվում են
Sun, 28 Jun 2026 18:15:59 +0400
ԱՄՆ նախագահ Դոնալդ Թրամփը կարգադրել է պատկան կառույցներին հետաքննել, թե ինչու Միացյալ Նահանգներում դեռ պահպանվում են բենզինի բարձր գները։ Սոցկայքի իր էջում հրապարակած գրառման մեջ՝ նախագահ Թրամփը մտահոգություն է հայտնել առկա իրավիճակի հետ կապված, երբ շուկայի խոշոր խաղացողները չեն շտապում նվազեցնել վառելիքի գները նույն արագությամբ, ինչ արագությամբ որ նավթն է էժանանում Համաշխարհային շուկայում։
«Խոշոր նավթային ընկերությունները չեն նվազեցնում գները լցակայաններում այնքան համաչափ, որքան նավթի գներն են նվազում, որոնցով նրանք գնում են նավթը։ Նավթի գները ներկայումս շեշտակիորեն նվազում են։ Այլ խոսքով ասած՝ խոշոր ընկերությունները սպառողից «երեք կաշի են մաշկում»։ Հանձնարարել եմ Արդարադատության նախարարությանը անհապաղ պարզել, թե ինչն-ինչով է։ Բենզինի գները պետք է նվազեն շատ ավելի արագ տեմպով, քան հիմա է նվազում»,- գրել է Սպիտակ տան ղեկավարը։