Հայտնի է՝ երբվանից կարող են դիմել վարորդականների վերականգնման համար
Fri, 03 Jul 2026 11:21:57 +0400
Ներքին գործերի նախարարությունը ,ինչպես հայտնի է, նախաձեռնել է վարորդական վկայական ստանալու քննությունների կազմակերպման և վկայականների տրամադրման ընթացակարգերի մի շարք փոփոխություններ։ Նախարար Արփինե Սարգսյանի ներկայացմամբ՝ դրանք մշակվել են քաղաքացիների հետ իրականացվող շարունակական քննարկումների և ծառայությունների բարելավման ուղղությամբ տարվող աշխատանքի արդյունքում։
Առաջարկվող հիմնական փոփոխություններից մեկը վերաբերում է բժշկական տվյալների թվային փոխանակմանը։ Նախատեսվում է ապահովել ավտոմատ կապ «Արմեդ» առողջապահական տեղեկատվական համակարգի հետ, ինչը հնարավորություն կտա անմիջապես ստանալ այն տվյալները, որոնք կարող են ազդեցություն ունենալ անձի վարելու իրավունքի վրա։ Այս մեխանիզմը կբացառի այն դեպքերը, երբ վարորդական իրավունք են ստանում անձինք, որոնք հաշվառված են համապատասխան բժշկական հաստատություններում և չեն համապատասխանում սահմանված պահանջներին։ Նոր համակարգի շնորհիվ անհրաժեշտ տեղեկատվությունը կհասնի ինքնաշխատ եղանակով, իսկ անհրաժեշտության դեպքում այն կարող է հիմք հանդիսանալ նաև վարելու իրավունքի դադարեցման համար՝ նույնիսկ եթե քաղաքացին չի այցելել հաշվառման-քննական ստորաբաժանում։
Փոփոխությունների հաջորդ կարևոր մասը վերաբերում է տեսական քննության արդյունքի գործողության ժամկետին։ Եթե ներկայում տեսական քննությունը հաջողությամբ հանձնելուց հետո գործնական քննությունը պետք է հանձնվի մեկ տարվա ընթացքում, ապա նոր կարգավորմամբ այդ ժամկետը կերկարաձգվի մինչև երկու տարի։ Նախարարության գնահատմամբ՝ վերջին տարիներին քննությունների նկատմամբ աճած հետաքրքրությունն ու հերթերի մեծացումը հաճախ դժվարացնում են սահմանված ժամկետում գործնական քննության հանձնումը։ Բացի այդ, շատ քաղաքացիներ նախընտրում են ավելի երկար պատրաստվել՝ նախ ավարտելով վարորդական դասընթացները և միայն հետո մասնակցելով քննությանը։ Երկու տարվա ժամկետը նրանց հնարավորություն կտա ավելի ճկուն պլանավորել քննության օրը և առանց ավելորդ շտապողականության պատրաստվել գործնական փուլին։
Նախագծով նախատեսվում է նաև վերանայել տեսական քննության հարցաշարերը։ Նոր մոտեցմամբ յուրաքանչյուր վարորդական կարգի կամ ենթակարգի համար կներառվեն միայն տվյալ տրանսպորտային միջոցին վերաբերող հարցերը։ Օրինակ՝ թեթև մարդատար ավտոմեքենայի վարորդական իրավունքի քննության ժամանակ այլևս չեն ընդգրկվի ավտոբուսների կամ այլ տրանսպորտային միջոցների շահագործման վերաբերյալ հարցեր։ Այս փոփոխությունը նպատակ ունի քննությունները դարձնել ավելի նպատակային, արդիական և համապատասխան յուրաքանչյուր կարգի առանձնահատկություններին։
Նախատեսվում է, որ վարորդական քննությունների կազմակերպման այս նոր կարգավորումները կսկսեն գործել սեպտեմբերի 1-ից։
Միաժամանակ նախարար Արփինե Սարգսյանը հայտնել է, որ վարելու իրավունքի վերականգնման հետ կապված օրենսդրական փոփոխություններն ուժի մեջ կմտնեն հուլիսի 6-ից։ Դրանից հետո քաղաքացիները կկարողանան սահմանված ընթացակարգով դիմել իրենց վարելու իրավունքի վերականգնման համար։